Hego Euskal Herrian, orotara 4.869 emakumek dute irekia "genero indarkeriaren edo etxeko indarkeriaren ondoriozko polizia babeserako espedientea". Gaur eman ditu datuak Eusko Jaurlaritzako Segurtasun Sailak. EAEn 4.565 emakume dira babes neurriren bat dutenak. Nafarroako datuak aldiz pasa den astean eman zituen Foruzaingoak, eta 304 herritar zenbatu ziren.

Zehatzago esanda, Bizkaian bizi dira gehienak –2.304 emakume–, ondoren Gipuzkoan –1.472– eta azkenik Araban, Nafarroako bikoitza baino gehiago –789 herritar–.

Biktimak lau arrisku mailatan banatzen dituzte, eta horren arabera zehazten dira babes neurriak. Biktima horiei guztiei autobabeserako prestakuntza ematen zaie, eta jarraipen bat egiten zaie –"aldian behin, telefonoz"–. Arrisku maila larriagoa izanez gero, bestelako neurriak hartzen dira. Nabarmenenak, bizkarzain pertsonalak; 66 emakumek dute EAEn. Eta epaileen aginduz, eskumuturreko elektronikoekin egiten zaie jarraipena 30 erasotzaileei. Urruntze aginduak ere ohikoak dira hiru Lurralde Historikoetan: orotara 3.023 kasu daude erregistraturik.

Berrikuntza

Bortxa izeneko sakelekoetarako aplikazio bat lantzen ari da Ertzaintza, "laister" izango da eskuragarri. "Genero indarkeriaren biktima diren emakumeentzako aplikazio espezifikoa" dela esan dute, eta laguntza eskatzea erraztea ekarriko du.

Bortxa telefono zerbitzuak ere jarraituko du bere zerbitzua ematen. Eguneko 24 orduetan du arreta zerbitzua, 900 84 01 11 telefono zenbakian.