Hilketa matxista izan zen Zarautzen joan den asteazken gauean: 47 urteko gizon batek 53 urteko emakumea hil zuen, itota. Ostegunetik zegoen atxilotuta akusatua, hilketa matxista leporatuta. Ostiralean, atxilotua hilketa gauzatu zen etxebizitzara eraman zuten ertzainek, gertaerak argitzeko asmoz. Ondoren, komisariara itzuli eta han izan dute igandera arte. Azpeitiko guardiako epaitegira eraman zuten igande goizean eta akusatuak bere testigantza eman ostean epaileak behin behinean espetxeratzeko agindua eman du. EFE albiste agentziak jakitera eman zuenez, gizonak aurrekariak dituela indarkeria matxistagatik. 

Gertakarien harira mobilizazioak izan ziren ostiralean Zarautzen. Udalak 19:00etan Lege Zaharren plazan deitu zuen elkarretaratzea, eta ondoren Mugimendu Feministak eta Itaiak deituta manifestazioa egin zuten. Gainera, hainbat udalerritan elkarretaratzeak egin dira hilketa salatzeko. Beste zenbait erakundek ere beren gaitzespena adierazi dute, hala nola: Emakundek, Eudelek eta Gipuzkoako Foru Aldundiak. Hain zuzen ere, aldundiak kontzentrazioa egin zuen Donostiako Gipuzkoa plazan.