Frantziako Gobernuak titanio dioxidoa debekatzeko erabakia hartu du elkarte eta parlamentarien presioek bultzaturik. Hasiera batean, Ekonomia eta Finantza ministro Bruno Le Maire sustantzia kimiko honen merkaturatzea etetearen kontra azaldu bazen ere, bere jarrera aldatzera beharturik ikusi da.

Minbiziaren Ikerketarako Nazioarteko Agentziak “seguraski minbizi eragile” bezala kalifikatu zuen titanio dioxidoa 2006. urtean. Pasa den urriaren 2an, Frantziako Batzar Nazionalak titanio dioxidoaren eta konposatu hau duen edozein produkturen komertzializazioa geratzearen alde bozkatu zuen.

Roger Lenglet kazetariak adierazi du titanio dioxidoa osasunarentzat “bonba” bat dela. Sustantzia kimiko honen partikulak “mutakorrak, zelulentzat toxikoak eta kartzinogenoak” izan daitezkeela gaineratuz.

Behin-betiko debekua ordea, ez da apirila baino lehen gauzatuko. Le Mairek zuzentzen duen ministerioak sustantziaren nanopartikulak aztertzen dituen ikerketa egiteko eskatu dio Elikagaien Segurtasunerako Agentzia Nazionalari apirilaren 15erako. Titanio dioxidoaren debekua gauzatzeko “baldintza legalak izan daitezen”.

Erabaki honek kritika ugari jaso ditu elkarte eta parlamentari ugariren partetik. Galarazpen ofiziala iritsi bitartean, Infonano.org webgunean sustantzia kimiko hau duten produktuen zerrenda egiten ari dira.