Ez dira pasatu, eta ez dira pasatuko
Larunbat arratsaldea Donostiako Easo plazan. Ehunka lagun bildu dira iragarritako abortuaren aurkako “prozesioari” aurre egiteko asmoz, deialdiaren atzean gordetzen direnen eta gordetzen denaren jakitun. Aspaldian ikusi gabeko aniztasuna nabari da bertaratutakoen artean: nerabe, gazte, heldu eta adineko, donostiarrak zein inguruetako herrietatik etorritakoak, bat eginik. Ordubeteren faltan, hasiak dira apainketa lanak, eta plaza eta inguruak pankartaz eta puxika eta kartulina morez bete dira.
Iritsi da ordua: “prozesioa” hastear da, eta Easo plazan bildutakoak Askabide klinikaren inguruetan batzen hasi dira. Irudiak gogora dakar orain 86 urte, 1936an, toki berean herritarrek altxatako barrikada. Oraingoan, ordea, herritarrez egina da harresia, eta ozen mintzo da: “Ez dira pasatuko”. Eta ez dira pasatu; abiatu ere ez dira egin.
Garai berriak dira, baina borroka zaharrak. Oraingoan herritarrena izan da garaipena –donostiarrena, gipuzkoarrena–, eta bereziki, mugimendu feministarena. Ospa dezagun, beraz, garaipena, eta senti gaitezen harro, baina ez gaitezen lasaikerian erori: gerra luzea da aurrean duguna, eta joan den larunbatekoa, bataila bat baino ez.
Izan ere, Enraizados elkarteak aspaldi eman zuen aditzera haien asmoa: hilabeteko lehen larunbatero manifestazioan ateratzea, “abortuak egiten dituzten kliniken aurrean errezatzea debekatzen duen araua erori arte”; alegia, 4/2022ko apirilaren 12ko legea “erori” arte. Haien azken helburua, beraz, emakumeon oinarrizko eskubideak babesten dituen legea, gure eskubideak askatasunez egikaritzea ahalbidetzen duena, indargabetzea. Eta, Madrilen behintzat, lasai asko dihardute horretan, inolako eragozpenik gabe; are gehiago, horren ordez, beren eskubideak aldarrikatzera bertaratutako ekintzaile feministak identifikatzen aritu ziren indar polizialak joan den larunbatean Dator klinikaren inguruetan; protestarien bizkartzain aritu ziren, abortuaren aurkako manifestariak babestuz. Antzeko irudi tamalgarria izan genuen Donostian ere apirilaren 2ko hartan, eta joan den larunbatean gauza bera gertatu ez bazen, herritarren erantzun irmoagatik izan zen, argi eta garbi.
Egoera honen aurrean, agerikoa da kezka: noiz arte jarraituko dute erakundeek horrelako ekimenak onartzen? Noiz arte, emakumeon oinarrizko eskubideak zapaltzen dituzten egitasmoak baimentzen? Noiz arte, emakumeon sexu- eta ugaltze-eskubideak urratzen dituzten protestak babesten? Eta gurera etorrita, Donostiako Udalari eta Eusko Jaurlaritzari: zein izango da zuen jarrera hemendik aurrera horrelako deialdien aurrean? Horrelakoetarako baimenak ematen jarraituko duzue, gero azken orduan bertan behera uzteko? Zergatik ez, orduan, hasiera-hasieratik debekatu? Herritarron esku uzten jarraituko duzue geure oinarrizko eskubideen defentsa, orain arte bezala? Noiz hasiko zarete neurri eraginkorrak hartzen horrelakoak gerta ez daitezen?
Aski da. Herritarrok ez genuke egunero kalera atera behar geure oinarrizko eskubideak borrokatzera; horixe da, hain zuzen ere, zuen lana. Ekar dezagun gogora, beste behin, 4/2022ko apirilaren 12ko legeak ezartzen duena: “Inork, haurdunaldia borondatez eteteko eskubidea oztopatzeko helburuarekin, emakume bat jazartzen badu ekintza gogaikarri, iraingarri, larderiatsu edo hertsagarrien bidez eta emakumearen askatasuna kaltetu, hiru hilabete eta urtebete arteko espetxealdi-zigorra ezarriko zaio, edo hogeita hamaika eta laurogei egun bitarteko komunitatearen mesederako lanak”.
Indarrean dagoen legediak nahikoa berme izan behar luke ikuskizun zeken hauek gure kaleetatik behin betiko ateratzeko. Baina, gaur-gaurkoz, ez da horrela, eta herritarrok ez gaude lasai –agerian gelditu zen hori larunbatean Donostian–. Horrenbestez, Eusko Jaurlaritzako Segurtasun Sailari: betearaz ezazue legea, beste hainbatetan hain modu eraginkorrean egin duzuen moduan, eta hartu benetako neurriak legez kanpoko ekimen hauek gure kaleetatik behin betiko ateratzeko: utzi horrelako egitasmoak baimentzeari, eta debeka itzazue erabat.
Eta herritarrei: jarrai dezagun erne, borrokarako prest, gure kaleetara itzul ez daitezen. Ez dira pasatu eta ez dira pasatuko, ez orain, ez gero.
Bidali zure iritzi artikuluak iritzia@argia.eus helbide elektronikora
ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.
Donostia arpilatua, bortxatua eta propio erreta Espainiako independentziaren alde 1813ko abuztuaren 31n.
1808an Napoleon enperadoreak Baionan bildu zituen elkarren aurka borrokatzen ari ziren Espainiako errege aita-seme borboiak, Carlos IV.a eta Fernando VII.a, biek nahi... [+]
Sarriegi jokatzen dugu erreaktiboki Euskal Herrian eta Euskalgintzan. Albiste bat, elkarrizketa bat, epai bat, eraso bat. Ondoren, erantzuna. Tamalez, berriro ere inertzia berak nakar Ander Gurrutxagaren elkarrizketa euskarafoboa aztertzera. Gustura gelditu zen, tartean zera... [+]
Euskararen (euskaldunon) aurkako oldarraldiak ertz ugari ditu; horietako bat fronte mediatikoa da, Voxento taldea buru eta PSOE-CCOO-UGTko kide ezagunak ekintzaile nagusi. Sarri eskaintzen digute idatziren bat, barnera dezagun Euskal Herriko hizkuntza ofizialetatik zein diren... [+]
Duela gutxi, Netanyahuren gobernuak, AEBen baimenarekin, legez kanpoko jarduerarekin jarraitzea erabaki du Gazan, eta zerrenda osoaren kontrola hartzea. Historia pixka bat egingo dut ez zaidalako zuzena iruditzen komunikabide edo kazetari batzuek Gazan gertatzen ari dena 2023ko... [+]
Abuztuaren 15ean Vladimir Putin eta Donald Trump Alaskan bildu ziren. Ofizialki, Ukrainako gerrari amaiera emateko bidean beste urratsen bat emateko. Baina Gazan milaka pertsona hiltzeko gupidarik ez duen politikariak serio esan al dezake penagarria eta tristea dela Ukrainan... [+]
Duela egun gutxi 6.000 alegazio baino gehiago aurkeztu dira Azantzan eta Sarbilen poligono eoliko berri bat eraikitzeko proiektuaren aurka. Antzeko beste proiektu batzuetan bezala, herritar eta talde antolatuen ahaleginari, antolaketari eta lanari esker egin da alegazioendako... [+]
Artikulu bati zer nolako izenburua jarri ez da aise hautatzen, ezta? Hasiera batean, “euskaldun gezurti, tranpatiak” bezalako izenburua idazteko asmoa nuen, baina inor mintzeko gogorik ez dudanez, goikoari eutsi diot, ene gogoetaren muina hobeto ulertaraziko... [+]
2025ean hazkunde ekonomiko txikia (%0,6) ez da gai izango langabezia-tasak %8ko muga gainditzea saihesteko; Zor Publikoak bi bilioi euro (BPGren %115) gainditzen ditu EK-k ezarritako %60aren oso gainetik, eta Gastu Publikoak estratosferan jarraitzen du.
Horri gehitu behar... [+]
Eskubide linguistikoen ikuspegi integratzaile baten eskaintza dugu gaurkoa.
Espainiako supremazismo linguistikoa osasuntsu eta bizkor ageri zaigu, “hooligan” samalda anitz baten babesaz eta komunikabide indartsuez sustatua. Azken aurreko lagina Santi Martinezena... [+]
Euskal Herri osoan —beste herrialdeetan bezalatsu— jairik ez da falta. Negu giroan ere asko badira ospatzen direnak, uda-garaian ez da festa gabeko egunik. Egun-argi luzeak eta gau epelak jendea etxe zuloetatik kanpora, kalera ateratzeko aproposak dira eta jai giroan... [+]
Azken asteetan bolo-bolo dabil Poliziaren eta, zehatzago esanda, Ertzaintzaren gaineko eztabaida. Tamalez, eztabaida piztearen arrazoia ez dira horiek Euskal Herri Langilearen kontra erabiltzen dituzten biolentzia eta jazarpen sistematikoa. Horren ordez, Ertzaintzaren eta bere... [+]
Artikulu honek badu testuinguru bat lerroburuaren gainetik, Hernaniko Udalean Kontxita Beitiak aurkeztutako Euskal Euskal Errepublikaren aldeko mozioa onartu ez izana. Harira!
Prozesu heterokronikoa
Kultura judeokristau, musulmana eta platonismoaren ustez, denbora aurrera... [+]
A zer zortea gurea! Inork nahi ez duen edozein industria-proiekturentzako puntu bero gogokoena gara gu! Ezkerraldea eta Meatzaldea, beti prest beste leku batzuetan gogaitzen duen guztia beso zabalik hartzeko. Petronor? Ederto. Lindane-hobi bat? Aurrera. Dorre elektrikoak gure... [+]
Hemengo politikariek haien diskurtsotan immigranteen etorreraren alde edo kontra egiten dute. Immigrante ez-zurien etorreraren alde edo kontra, noski. Beste mugimenduak ez dut uste gehiegi inporta zaizkienik, edozein alderditakoak izanik ere. Tronu altu-altu batetik begiratzen... [+]
Duela gutxi Eusko Jaurlaritzak bultzatutako "Euskadiko Osasun Ituna" izenekoaren porrota ez da anekdota politiko soil bat, ezta osasun-kudeaketan unean-uneko estropezu bat ere. EAEko osasunaren ikuspegi kolektibo, inklusibo eta benetan publiko bat galtzea politika... [+]