Osasun Ministerioak eta erkidegoek medikuntza protokolo bat adostu dute eutanasia eskatzen duten pazienteen egoera ebaluatzeko irizpideak zehaztuta. Halaber, jardunbide egokirako gida bat lantzen ari dira eta, besteak beste, hiltzen laguntzeko farmakoak gomendatuko dituzte. Nork bere borondatez eta idatziz egin beharko du eskaria, agiria mediku baten aurrean sinatuta, eutanasia aplikatzeko baldintzak eta urratsak jasotzen dituen EITBren dokumentuan irakurri daitekeenez. Derecho a morir plataformak ere luze azaldu du eutanasia nola eskatu.

Besteak beste EAJ, EH Bildu, PSOE eta Unidas Podemos alderdien babesari esker lortu du gehiengoa eutanasiaren aldeko legeak. Eskuina haatik gogor mintzatu da lege honen aurka, eta Konstituzio Auzitegiak esaterako tramiterako onartu du Vox alderdiak jarritako helegitea. PP eta UPN ere aurka agertu dira, baita Hazte Oír edo Abogados Cristianos bezalako erakunde ultrakatolikoak ere.