Arabako Foru Aldundiko iturriek EITBri esan diotenez, aste honetan espediente administratiboa zabalduko diote Bernedoko udalekuak antolatzen dituen Euskal Udalekuen Sarrea elkarteari. Aurretik hitzez abisatuta zegoen: urriaren 9an, Arabako Batzar Nagusietan egindako agerraldian, asmo horien berri eman zuen Ana del Val Kultura eta Kirol diputatuak. 

Aldundiko iturrien esanetan, espediente administratibo horren helburua da "salatu direnak bezalako gertakariak berriro ez gertatzea". Zigorrak ere ezarri daitezke, baina EITBren arabera, "oraindik" ezin dute zehaztu, "prozesu luzea" izango delako. Are, Gasteizko Instrukzio epaitegiko areto batek zabalik du ikerketa, eta aldundiak jakinarazi du gelditu egingo dutela espedientea, epaitegikoa bide penalera iristen bada.

Eusko Jaurlaritzak eta Arabako Foru Aldundiak diskurtso bertsua darabilte: Euskal Udalekuek administrazioari jarduera "ezkutatu" egin diotela urtetan, ez zutela haien dinamikaren berri, eta "jarraipena" egiteko aukerarik ez dutela izan. Nerea Melgosa Jaurlaritzako Gazteria sailburuak "klandestinotzat" jo zituen udalekuak.