“Guri dagokigu gatazka armatuaren garaia ixtea, gure indar guztiak prozesu politikoa bultzatzera eskainiz (…) Eta hori egiteko modu bakarra da zuzenean iniziatiba hartzea, inori eta ezeri itxaron gabe”, dio testuak. 2017ko apirilean erredaktatu zen, desarmea burutu zen hilabetean berean hain zuzen, Garak azaldu duenez.

Horren arabera, erakundearen jarraipena bidera ezina dela ondorioztatu du ETAren zuzendaritzak.  Erakunde “kobentzional” moduan jarraitzeko “beste guztia berrasmatu” beharko lukeela uste dute eta lortu beharreko “gehiengo zabalek” ez luketela ulertuko eta “oztopo” bat izango litzatekeela. Zentzu horretan, amaiera emateari uko egin dioten beste erakunde armatu batzuen “nahasmena” aipatzen du testuak, “sigla fantasmak” bihurtzeraino.

Garak nabarmendu du proposamena onartua izaten bada “erakundea de facto desagertuko” litzatekeela. Nolanahi ere, erakundearen “zereginak” aurrera jarraituko lukeela testuak: “Aurrera egiteko proposamena da eta horretarako garrantzitsua da ETAren eta bere inguruaren eraginpean sorturiko indar militante guztia Ezker Abertzaleari, prozesu independentistari eta herri mugimenduari ekarpena egitea”.