Ertzain berriak aukeratzeko prozesua abian dela hartu du erabakia Jaurlaritzak eta ondorioz, orain arteko hautaketa-prozesua gainditu duten 635 gizonezkoek eta 241 emakumeek ertzain izateko aukera handiagoak izango dituzte. Astearte goizean informatu du Segurtasun sailak hartutako erabakiaz Beltran de Herediak.

Ez da honelako erabaki bat hartzen den lehenbiziko aldia, baina aurrekariak aspaldikoak dira: 1993an egindako 1.200 plaza berri sortu ziren, hori bai, urte hartan egindako 13. eta 14. promozioak batuta eta testuinguru politiko oso diferente batean.

Aurtengo kasuan, Ertzaintzan sortu den belaunaldi-berritze premiak aipatuz justifikatu du erabakia sailburuak. 2018an 486 baja eta erretiro izan zirela azaldu du eta aurten 144 izan direla –sailburuak ez du zehaztu kopuru horietatik zenbat diren beste arrazoiengatik hartutako bajak eta zenbat, aldiz, jubilazioei dagozkienak–. Datu horiek ikusita Segurtasun saila “esfortzu handiagoa” egitera derrigortuta dago Beltran de Herediaren arabera.

Gainera, aurreratu duenez, urtea amaitu baino lehen beste promozio bat ere martxan jarriko dute, 29.a. Bigarren deialdi horretan zenbat plaza eskainiko diren ez du argitu astearte honetan prentsaren aurrean egindako agerraldian.