Emakumeak borrokan

Elkarrekin Ahal Dugu garaile nabarmena Hego Euskal Herrian

  • 428.285 botorekin eta EAJ bigarren alderdiari 142.000 botoko aldea aterata, Elkarrekin Ahal Dugu izan da garaile Hego Euskal Herrian. Espainiako hauteskunde orokorrak alderdi abertzaleentzat plaza zaila izan arren, nabarmentzekoa da lehen aldia dela norbaitek EAJ Bizkaian garaitu duela.

Lander Arbelaitz Mitxelena @larbelaitz
2016ko ekainaren 27a
Elkarrekin Ahal Duguko kideak emaitzak ospatzen. (Monika Del Valle / Argazki Press)

“Euskadi aldatzen ari da, alternatiba badago. Astelehenetik aurrera urriko hauteskundeak prestatzen hasiko gara, Jaurlaritza herritarren zerbitzura jartzeko”, adierazi du Nagua Albak hauteskunde gauean. Udazkeneko Eusko Legebiltzarrerako hauteskundeetara begira jarrita daude euskal indarrak. Nafarroan bigarren indarra izan dira 94.555 botorekin, iaz baino 13.000 gehiago.

EAJ bigarren indarra izan da Hego Euskal Herrian; lurraldeka zehaztuta, bigarrena Bizkaian eta Gipuzkoan. Ehunekotan gora egin arren, 16.101 boto eta eserleku bat galdu ditu abendutik hona, eta azkenean 5 diputatu eta 286.215 botorekin joango da Madrilera. Badirudi paper garrantzitsua joka dezakeela Espainiako Kongresuan, nahiz eta urriko EAEko hauteskundeak buruan, ezin dion Rajoyri inbestidura oparitu.

Hego Euskal Herrian PPk eta UPNk osatzen duten blokeak 254.073 lagunen babesa lortu eta gora egin du. Ciudadanosen kontura igo da estatu mailan eta Hego Euskal Herrian badirudi tendentzia errepikatu egin dela. Nafarroan eta Araban dira indartsuen popularrak eta unionistak, Nafarroan lehen indarra eta Araban bigarren. Geroa Bai, Nafarroako lehendakariaren alderdiak, emaitza txarrak lortu ditu: Eskuratu dituen 14.289 botoak baino gehiago galduta (16.353), Ciudadanosek ere aurre hartu dio Nafarroan. Aldaketaren indarren gainetik geratu dira nabarmen errejimen zaharreko alderdiak. Ciudadanosek, bestera, 40.326 boto lortu ditu EAEn, hauteskunde hauen lehen botean baino ia 10.000 gutxiago.

PSOEk eutsi egin dio Hego Euskal Herrian 221.580 botorekin, 4.736 irabaziz. EH Bilduren aurretik geratu izana nabarmentzen hasi dira hedabideetan alderdi honen hainbat ordezkari.

EH Bildu bosgarren indarra izan da eta abenduko emaitza txarrekin konparatuta, 35.000 boto galdu dituzte. Orotara 184.092 herritarren babesa eskuratu dute. Nafarroan eutsi dio ongien, nahiz eta Bakartxo Ruiz ordezkaritza lortzetik urrun geratu. Aldaketa prozesuan dago ezker abertzalea eta emaitzek berretsi dute badutela zer hausnartu eta zuzendu.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Espainiako hauteskunde orokorrak 2016  |  EAJ  |  PSE-EE  |  EH Bildu  |  PP  |  UPN  |  PSOE  |  Podemos

Espainiako hauteskunde orokorrak 2016 kanaletik interesatuko zaizu...
Eguneraketa berriak daude