Notre-Dame-des-Landes, burujabetzaren lurraldea

  • Frantziar gobernuaren lan kode aldaketak hautsak harrotu ditu. Manifestaldi, kanpaldi, greba, zentsura mozio, okupazio, ekonomiaren blokatze, sabotaje eta istiluak errepikatzen ari dira azken hilabete hauetan, ezkerreko elkarte, alderdi, sindikatu eta beste norbanako anitzen eskutik. Ildo kapitalista eta inposatzaileetan arrunt lerrokatua den botereari milaka herritarrek egiten diote aurre.

Bere burua sozialistatzat duen gobernuak ez du atzera egin nahi, ez eta erreforma honen kontra diren sindikatuek eta kolektiboek ere. Norgehiagoka luze honetan gatazkaren usteltzea aipu da eta inork ez daki xuxen irtenbidea nolakoa izango den. Horretan geldi ala urrunago jo, garaipena ala galtzea... Udaberri mugitu honi bakoitzak aterako dizkio komeni zaizkion kontuak. Emaitzak emaitza, jazoera hauek azpimarra daitezke jada:

- Azken urte hauetan indarrean zegoen sistemaren legitimizazioa pitzatu da nolazpait, bi bando kontrajarri daudela agerian utzirik: bere interes propioak defendatzen dituen erabakitzaileen taldetxoa alde batetik, logika politiko eta sozial bidegabekoak jasan behar dituen jendearen gehiengoa bestetik. Egoera honekin ados ez daudenei mespretxuz erantzun diete nagusiek, ikuspegien talka emendatuz: patronalaren buruak eta egunkari zenbaitek “terrorismo eta gerrilla” sindikala aipatu dituzte, manifestaldien debekua airean dago eta eskuineko alderdiek gobernuari sostengua ekarri diote, zeharka bada ere.

- Lan legearen kontrako mobilizazioak oztopatzeko, errepresioaren eta beldurraren bidez bazterrak lasaitu nahi dituzte baina ez dute lortzen. Manipulazioek zart egin dute. Atentatu jihadistak direla eta lurraldea urgentziazko estatuaren pean egonik ere, jendea ez da kikildu, ez du seguritatearen eta ordenaren izenean gobernarien manuen pean egon behar denik sinetsi. Urgentziak ugari daudela entzun da aldarrikapenetan, hala nola ordezkaritza eta erabaki politikoen arloak errotik aldatu beharrak.

- Ohituraz zatiturik dauden sektore militanteek mobilizazio sozial azkar eta koloretsua bultzatu dute elkarren ondoan, egin-molde eta aldarrikapen desberdinak erabiliz eta hedatuz, nabardurak eta ezadostasunak alboratu gabe. Mobilizazio gehienetan, borroken konbergentzia izan da praktikan ezarri den tresna. Manifestaldi jendetsuetan giro solidarioa eta borrokalaria ageri da maiz, zaurituen artatzeko boluntario taldeekin, kapitalaren eta Estatuaren sinboloen kontrako erasoekin. Poliziaren jarrera gogorrak aurkako frente zabalaren osaketa eragin du eta erreformista/iraultzaile, bakezale/bortitz kontzeptu bereiziak pixkanaka lausotu egin dira.

- Karrikara atera direnentzat, fatalismo eta etsipenari kemenak eta esperantzak hartu diete gaina, erresistentzien eta alternatiben zilegitasuna motibazioen bihotzera ekarriz. Urte luzeetan hamaika batailetan isolaturik eta ezinean aritu direnek hauspoa izango dute gertaturikoari segida emateko, lehen lerroan kopuru handian oldartu den jende gaztearekin batera: esperientzia honetatik asko izan daitezke biharko dinamika herrikoietan parte hartuko dutenak, etxean isilik geldituz ezer ezin dela aldatu ikusirik. 

Haize freskoak heldu dira frantziar estatuan, eta badituzte iturburuak. Esate baterako, badago Nantes hiriaren ondoan azken sei urte hauetan borroken konbergentzia eraginkorra, heldu berrien eta biztanleen politizazioa, auto-formakuntza eta bizimolde kolektiboen eraikuntza gauzatzen dituen eremu askatua: Notre-Dame-des-Landes. 1972tik beharrik gabeko nazioarteko aireportua egin nahi duten lurretan milaka lagun proiektu aldarrikatzaileetan murgildu dira, Vinci enpresak erosi lurrak berreskuratzeko bertako laborariek luzatu deialdiari jarraikiz. Izan ekologista, libertario, lekuko hautetsi edo bretoi abertzale, elkarrekin atondu dira gunearen eta okupatzaileen babesteko. Hasieran oposizio dinamika zena erreferentzia baikor erreala bihurtu da denboraren poderioz, Frantzian baita Europa osoan. Barne ika-mikak ez dira falta baina gaur hara hurbiltzen denak sinpleki suma ditzazke bertako animoak: jardun, elkar lagundu, errotu, epe luzera jo. Horrez gain, bata eta bestearen ekarpenei leku eman, iritzi eta eginbide desberdinak gurutzatu, iniziatibak horizontalki koordinatu, ekintza legala eta ilegala osagarriak direla onartu... Indar batu eta anitzak garatzeko.

Eta su hau itzaltzeko, gobernuak ez daki zer egin. Epaileei dei egin die maiz, poliziak kopuru handian bidali, inkesta eta txosten interesatuak manatu, bertan “basa oihanaren legea” dagoela sinestarazi, sasi-erreferenduma iragarri... Alferrik. Notre-Dame-des-Landes aurrera doa beti, berrogei bizitegi okupaturekin, baratza eta hazkuntza lursail, okindegi eta auzolanekin, hamarnaka mila pertsona mugi ditzaketen manifestaldiekin, berrehun sostengu komiterekin. ZAD deitzen diote, Zone A Défendre, Babestu Beharreko Gunea, kapitalismoaren xedeei ezetz erran eta burujabetasuna gaurdanik egitea posible dela guztioi erakutsiz.

Euskal Herrian militantzia molde berrituak bilatzen gabiltzanontzat, Notre-Dame-des-Landes aberasgarri, baikor eta maitagarri zaigu. EHZ festibalaren antolatzaileek, uztaileko lehen egunetan ZADeko biztanle okupatzaileak gomitatuko ditugu bizi eta egiten dutena konta diezaguten, Lekornen, Donostian, Gernikan, Galdakaon, Gasteizen eta Baigorrin. Bide batez, abuztuaren azken astean Notre-Dame-des-Landesera antolatuko dugun brigadara gomitatzen zaituztegu, guk ere eredu hori lehen eskutik ezagutu dezagun, auzolanetan parte hartuz eta hango jendeekin topaketak eginez*. Asko baitugu gure auzoengandik ikasteko.

* Izenak emateko: ehzadista@yahoo.com

 

*Amaia Ajuria, Hartzea Lopez Arana eta Txomin Urriza EHZ festibaleko kideak dira.

Bidali zure iritzi artikuluak iritzia@argia.eus helbide elektronikora

ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.


Kanal honetatik interesatuko zaizu: Iritzia
Materialismo histerikoa
"Mario Lopez" eta "Gernika"

Krimen matxistak, mediatizatzen direnean, emakumeontzat lezio bilakatu ohi dira, eta bizirik badago, biktimarentzat. Nerea Barjola ikertzaileak Alcasserko kasuaren bidez azaldu zigun hori. Eta Nagore Laffageren hilketak ere lezio astun bilakatzeko arriskua izan zuen, lezioa... [+]


2024-03-31 | Ula Iruretagoiena
Lurraldea eta arkitektura
Bestaldera begira

Eta arkitektoen burbuilean, krisi klimatikoaren gaineko kezka igartzen al da? Galdetu dit agroekologoak.

Eraikuntzaren sektorea CO2 emisioen portzentaje altuaren eragilea izanik, galderak zentzua badu. Naomi Klein-ek Honek dena aldatzen du liburuan kontatzen du nola hegazkin... [+]


2024-03-31 | Diana Franco
Teknologia
Gorputzaren memoria

Mekanografia ikasi baduzu, gitarra jotzen, josten edo eskuz idazten, ulertzen duzu zure gorputzak zelan memorizatzen dituen zenbait jarduera. Gorputza eta adimena modu miresgarrian daude harremanduta, bat dira. Gizakiok sortu dugun teknologia eta honek gure gorputzarekin duen... [+]


Energia berriztagarrien zabalpen masiboaren iruzurra

EH Biziriketik sarritan salatu izan dugu energia berriztagarrien zabalpen masibo honen atzean   ezkutatzen   den   eredu   ekonomikoa.   Hazkunde   ekonomikoa   ezinbesteko baldintza duen eredu ekonomikoan... [+]


Eguneraketa berriak daude