Emakumeak borrokan

Elkanoren Nao Victoria itsasontzi-museoa ez dela ongi etorria salatuko dute Lekeition

  • Espainiako Fundación Nao Victoriak kudeatzen duen itsasontzi-museoa abuztuaren 21etik 26ra Lekeition izango da. Bere etorrerarekin bat herritar talde batek "txarto-etorria" antolatu du "inperialismo espainiarraren mertzenarioei, omenaldirik ez!" lelopean.

Axier Lopez @axierL
2018ko abuztuaren 16a
Nao Victoria artxiboko irudi batean. Argazkia: Fundaciˇn Nao Victoria

Juan Sebastian Elkanok munduari bira emateko erabili zuen itsasontziaren erreplika asteartean, 21ean, helduko da Lekeitiora. Itsasontzia Sevillan eraiki zuten 1991ean, "Amerikako Aurkikuntzaren V. Mendeurrena" ospatzeko Espainiako Gobernuak antolatu zuen "Expo 92" delakoren harira. Itsasontziak egun "inperialismoaren historia zuritzeko" betetzen duen funtzioa salatzeko kontzentrazioa antolatu dute 19:30ean Lekeitioko kaian (San Pedropian).

Getarian Elkanoren Lehorreratzean parte hartu ostean, itsasontzia Bermeoko portuan izan da. Egun Mutrikun dago, igandera arte. Ondoren Lekeitiora abiatuko da eta Euskal Herriko bira amaitzeko Santurtzin eta Bilbon egingo du geldialdi bana.

Ondorengoa da protesta ekimenaren antolatzaileek zabaldu dituzten arrazoiak eta kartela:

Badakizu nor izan zan Juan Sebastian Elkano?

Bai, horixe bera: munduari bueltia lehelengoz emon eutsana. Ganera euskaldun jatorra. Colon eta abarren modura, on dala 500 urte, “mundu barria” ezagutu eta bertara zibilizaziñoia eta progresua erun ebazana. Heroe bat, pertsona miresgarri bat.

Bersiño ofiziala konta dotzue, ezta?

Ez dotzue konta Ipar Afrikako eta Ipar Italiako konkistetan parte hartu ebala, eta munduari buelta emon eutzanian leku “berri” gehienetan lapurreta, hilketa, bahiketa eta bortxaketa eragiteaz gain, Filipinetako herrialdiak kolonixatzeko lehen harria ipini ebala?

Eta badakizu bere eta bere tripulaziñoien ibilerak omentzeko eta goraipatzeko Espainiako Gobernuak bere txalupien erreplika bat ein ebala 1991an (kolonizaziño eta genozidijuen V. mendeurrena zala-ta) eta abuztuan zihar EHan ibiliko dala portuz portu?

Eta Lekittotik be pasako dala? Eta Espainiako Defensa Ministeritziak zuzendutako kanpaina baten parte izango dala? Eta “vascongadetan” be fundaziño bat sortu dabela “Elkanoren bitartez euskaldunon izen ona mundura zabaltzeko”? Elkano goraipatziaz batera espainiar inperialismua zuritu eta ezkuta nahi dabela, besteren artean, turismoa bultzatzeko? Eta “vascongadetako” alderdiak be bat ein dabela honegaz? “Euskadi” baketu eta normalizatu bat mundura hedatu eta negozijuak etxen segitzeko, on dala 500 urtetako imperialismuan gehiago sakontzeko?

Gutzat, inor omentzeko baldin badago, hori atzo eta gaurko kolonialismo eta inperialismuen aurrian erresistentzia mantendu izan daben herri-langiliak diraz, eta ez ostera imperio zapaltzailien (Euskal Herrien zapaltzailiak be bai, bide batez) mesedetara aritu eta aberastutako jauntxuak.

Eta zelan ikusten dozu hau dana? 500 urtetako kolonialismo, zapalkuntza, genozidio, lapurretak…ezkuta eta arpeija garbitzen itxiko dotzagu? Anima eta etorri txarto etorria emoten!

 

Nao Victoria itsasontziak zabaltzen duen mezuari buruzko informazio gehiago: www.argia.eus/albistea/nao-victoria-getarira-heldu-da-espainiako-inperioaren-krimenak-zuritzen-dituen-itsontzi-museoa

Juan Sebastian Elkanoren mundu birari buruzko informazio gehiago: www.argia.eus/albistea/zein-izan-zen-juan-sebastian-elkano-zer-egin-zuen

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Elkanoren mundu bira kanaletik interesatuko zaizu...
Azkenak
EGILEA
Eguneraketa berriak daude