Euskal Herriko Unibertsitateak Medikuntza eta Erizaintza Fakultate berria eraiki asmo du Bilboko Basurto ospitalearen ondoan. Iazko urrian eman zuen proiektuaren berri, eta lehen lizitazioa atera zuen. Eraikuntza kostuen garestitzea dela-eta, ordea, fakultate berrirako iaz aurreikusitakoa baino hamaika aldiz kostu altuagoak aurreikusi dituzte: 64,1 milioi euro. Eraikina 2026-2027 ikasturterako erabilgarri egotea espero du unibertsitateak.

Hasiera batean, ABEE aldi baterako Medikuntza enpresa elkartea zen obraren ardura hartzekoa, 53,4 milioi euroren truke. Baina pasa den abuztuan ezezkoa eman zuen, energiaren eta lehengaien garestitzeagatik errentagarria izango ez zitzaiolakoan. EHUk lizitaziorako baldintzak berrikusi ditu eta eraikuntzaren kostua 64.092.555,22 euroan zenbatetsi du. EAEko Euskadi Next programako funtsetatik finantzatuko da. 

Bigarren esleipen honetarako, enpresek 2023ko otsaileraren 3ra arte aurkeztu ahalko dituzte euren eskaintzak. Kontratua maiatzaren bigarren erdialdean itxi asmo du EHUk, eta eraikuntza lanak ekainaren bigarren hamabostaldian hastea. Horrela, fakultatearen estreinaldia ikasturte bat azteratuko da; eragozpen gehiagorik ezean, 2026-2027 ikasturterako erabilgarri egotea aurreikusi du EHUk, hasiera batean 2024rako amaituta izan asmo bazuen ere.  

Fakultatea lau eremutan banatuko dute. Horietatik handiena ikerketara bideratuko da; 5.300 metro karratuko lursaila erabiliko dute eremu horretarako. Unibertsitate ikasketei dagokienez, Medikuntza, Erizaintza eta Fisioterapia graduak eskainiko dira bertan, baita zazpi master ere: Zahartze Osasungarria eta Bizi Kalitatea; Farmakologia; Ingeniaritza Biomedikoa; Ikerketa Biomedikoa; Mikrobiologia eta Osasuna; Neurozientziak; eta Osasun Publikoa.