2012ko maiatzean atera zen plazara Edo! argitaletxea, filosofia aldetik berrikuntzak ekarriz: editorial independente eta autofinantzatua izateko bokazioa eduki du hasieratik, eta kolektiboki lan egiteari eman dio garrantzia. Urte hartako azaroan kaleratu zuten lehenbiziko erreferentzia, Charlotte Perkins-Gilmanen Hormako paper horia.

Guztira hamabost liburu argitaratu ditu Edo!-k bere ibilbide laburrean, eklektizismoaren aldeko apustu nabarmena eginez. Saiakerak, ilustrazio eta argazki-liburuak, itzulpenak eta artista-liburuak publikatu dituzte besteak beste, tartean euskaratu gabe zeuden klasiko unibertsalak –Virginia Woolfen Dalloway anderea kasu–.

Agur esateko testuan diotenez, "kulturaren alde egin dugu porrot". Argitaletxea ixteko arrazoien artean daude ardurak eta lan kargak desorekatu izana, lan taldea zabaltzen ez asmatu izana, nekea, kideek beren burua ez zaindu izana eta etorkizunera bultzatzen ez jakitea. "Garaiz eta ongi bukatzeari garrantzitsuago iritzi diogu, hala-moduz jarraitzeari baino".