Arabako, Bizkaiko eta Gipuzkoako jatetxeek, gutxienez, mahai bakoitzean dagoen pertsona baten kontaktu datuak gorde beharko dituzte hiru astetan zehar. Zerbitzua eman den data eta ordua ere jaso beharko dute establezimenduek, eta osasun zerbitzuek eskatuz gero, datuak luzatu beharko dizkiete. Osasun Sailak pandemiari aurre egiteko protokoloan bildu du eguneraketa, eta koronabirus kasuren bat egonez gero, kutsatuen jarraipena egiteko balioko du. 

Dokumentuan, ostalaritza sektorean ezarrita dauden hainbat neurri ere gogorazi ditu gobernuak —distantziak, aireztapena, edukiera zein itxiera orduak—, eta hainbat aholku luzatu dizkiete erabiltzaileei. Barnealdeetan derrigorrezkoa da musukoa erabiltzea; ez, horrela, kanpoaldean, kutsatzeko arriskua txikiagoa baita. Halere, Jaurlaritzak kanpoko espazioetan 1,5 metroko segurtasun distantzia errespetatzen saiatzeko deia egin du, eta, ahal izanez gero, erretzea ekiditeko gomendatu du. Birusaren zabaltzea gelditzeko, kreditu txartelarekin ordaintzea hobesten dela azaldu dute, kontaktu fisikoa saihesteko, esku-dirua baztertuz.