ARGIA.eus

2022ko ekainaren 28a

EAEko familiek hilean 200 euro jasoko dituzte ume bakoitzeko

  • Eusko Jaurlaritzak 36 neurri berri garatuko ditu demografiari lotuta eta neurri garrantzitsuenen artean honakoak daude: hilean 200 euroko laguntzak seme edo alaba bakoitzeko (3 urte betetzen dituen arte), gazteentzako maileguak eta haur-eskolen doakotasuna.

Umeak ikastolan. Argazkia: Dani Blanco.
2022ko ekainaren 21a

Erronka Demografikorako 2030 Euskal Estrategia onartu du ekainaren 21ean Jaurlaritzak. Estrategiak bost ardatz nagusi ditu: gazteen emantzipazioa, familien eraikuntza, zahartze osasungarria, migrazioa gizarteratzea eta landa-balioa handitzea. Maiatzaren 18an Eusko Legebiltzarrak erronka demografikoari buruz egindako osoko bilkuran onartutako ebazpen guztiak (74) jaso dira. “Estrategiaren helburua da baldintzak sortzea pertsonek nahi beste seme-alaba izan ditzaten nahi dutenean”.

Onartutako estrategia bat dator 2030 Agendaren Garapen Jasangarriko Helburuekin. Estrategia eta jarduera guztiei genero-ikuspegiaren berri eman zaie. Izan ere, helburuetako bat amatasuna edo aitatasuna beste bizitza-proiektu batzuekin aldi berean egin ahal izatea da.

Gainera, familia-aniztasuna, tratu-berdintasuna eta pertsonen eta familien diskriminaziorik eza aitortzea eta babestea da beste helburu bat.

Adinekoen autonomiari ere garrantzia eman nahi diote, bizitza osoa eta partaidetza soziala sustatu nahi dute bizi-ziklo osoan zehar “bizi-itxaropen osasungarria handitzea bultzatuz eta politikak, zerbitzuak eta programak adinekoen belaunaldien itxaropen, gaitasun edo interesetara egokituz”.

Azkenik, gazteei beren bizi-proiektua aurrera eramateko zailtasunei aurre egiten lagundu nahi zaie, emantzipazioaren aldeko baldintzak sustatuz.

Hiru multzotan jasota daude neurriak. Lehen multzoan lau jarduera aurreikusi dituzte, epe laburreko inpaktu-irizpidearekin. Lehena, 200 euroko laguntza hilean seme edo alaba bakoitzeko. Honela azaldu dute: “Bateragarria izango da 4 eta 7 urte bitarteko familia ugarientzako egungo prestazioekin, egungo zerga-kenkariekin eta DSBEaren seme edo alabagatiko laguntzekin”. Bigarrena gazteentzako maileguak dira: interesik gabeko maileguak izango dira eta epe luzera itzultzeko aukera emango dute. Ekintzailetzarako, prestakuntzarako edo etxebizitza proiektuetarako erabili ahal izango da mailegua. Hirugarren jarduera da 0-2 urteko etapan dauden umeentzako haur-eskola doakoa izatea. Laugarren eta azkeneko jarduera “ikuspegi demografikoa txertatzea” da. Legeak, arauak, estrategiak edo sektore-jarduketako planak edo inbertsio-programak egitean egingo da txertaketa hau.

Bigarren multzoak lau ardatz ditu baita ere: gazteak emantzipatzeko neurriak, etxebizitza, enplegua, ekintzailetza eta autonomia lortzen lagunduko dutenak; familien eraikuntza, kontziliazioa eta seme-alaben hazkuntza bultzatzeko neurriak; erabateko zahartze osasungarria bultzatu asmo duten neurriak; eta migratzaileak erakartzera eta gizarteratzera bideratutako neurriak.

Hirugarren multzoak zeharkako hiru “jarduera-ildo” zehaztu ditu: landa-inguruneko zahartzeari eta despopulazioari aurre hartu eta eremu horri berriro balioa emango dioten neurriak; prospekzioa, dibulgazioa eta komunikazioa; eta aurrekontua, jarraipena eta ebaluazioa.

Kanal honetan artxibatua: Eusko Jaurlaritza

Eusko Jaurlaritza kanaletik interesatuko zaizu...
2022-06-10 | ARGIA
Osakidetzako murrizketak salatzeko, ekainaren 26an manifestazioa deitu dute sindikatuek Bilbon

Jaurlaritzak Osakidetza desegin eta prekarizatu nahi duela salatzeko, ekainaren 26an manifestaziorako deia egin dute LAB, SATSE, ELA, CCOO, UGT eta ESK sindikatuek. Jesusen Bihotzatik aterako da, 12:00etan. Ekainaren 22an, aldiz, bilkurak eta itxialdiak egingo dituzte udan... [+]


2022-06-10 | Estitxu Eizagirre
EAEko DBHko ikastetxe batzuk jardunaldi jarraiaren alde mobilizatzen hasi dira

Pandemia dela-eta, azken ikasturteetan jardunaldi jarraia izan dute Derrigorrezko Bigarren Hezkuntzako ikastetxe askok. Praktikan probatu dutenean, ikastetxe batzuei egokiagoa iruditu zaie eguerdian bukatzen den jardunaldi mota hau eskolak goiz eta arratsalde zatitzen dituena... [+]


2022-05-26 | ARGIA
Ikasle ratioak murriztu eta egiturazko lanpostuak gehitzea adostu dute Jaurlaritzak eta sindikatuek

Eusko Jaurlaritzako Hezkuntza sailaren eta Steilas, LAB, CCOO eta UGT sindikatuen arteko akordioak jasotzen duenez, gehienezko ratioak jaitsi egingo dituzte hezkuntzako zenbait etapatan. Horrez gain, plazak egonkortzea, ingelesa 3 urtetik aurrera ematen hastea, eta premia... [+]


2022-05-25 | ARGIA
Etxebizitza Sindikatuak salatu du 70.000 euroko isuna jarri dietela etxegabetze bat oztopatzen saiatzeagatik

Eusko Jaurlaritzak eta Gasteizko Udalak jarri dizkiete isunak Gasteizko Etxebizitza Sindikatuko kideei, egotzita ez zituztela bete pandemian ezarritako neurriak 2021eko urtarrilean, hamabost lagunen etxegabetze bati aurre egiten ari zirenean. “Jazarpena” salatu dute... [+]


Ikasgeletako ratioak jaitsi nahi ditu Jaurlaritzak, jaiotze tasaren beheranzko joeraren aurrean

Jaiotze tasaren beheranzko joerak ikasgelak eta ikastetxeak itxi behar izatea ekarriko duela aurreikusita, Haur eta Lehen Hezkuntzan ikasgeletako gutxieneko ratioa jaitsi nahi du Eusko Jaurlaritzak, El Diario Vascok jaso duenez: gutxieneko ikasle kopurua 17tik 11ra jaitsi nahi... [+]


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude