ECDCk aurreko bi asteetan metatutako koronabirus kasuak grafikoki azaltzen ditu Eurupar Batasuna gehi Erresuma Batua biltzen dituen mapan, herrialde horietako eskualde administratibo bakoitzaren egoera zehaztuz. Kartan bost kolore-tonalitatetik bat ematen zaio eskualde bakoitzari: urdina azken bi asteetan COVID-19 kasu bakar bat eduki ez badu eta horitik marroi ilunera arteko lau tonutako bat segun eta eduki dituen 100.000 biztanletik 20 kasu baino gutxiago, 20 eta 59,9 artean, 60 eta 119,9 artean edo 120tik gora.

Irailaren 16a arteko azken 14 egunetan (2020ko 36. eta 37. asteetan) metatutako kasuen mapa da ECDCk eskaini duen berriena eta bertan nabarmena da zein neurritan ari den txarrera egiten COVID-19 pandemia Europan, eskualde asko argiagotik ilunagoko kolorera aldatu direlako. Espainiako estatua kasik osotasunean dago joan den astean bezala marroi ilunean, baina duela egun batzuk ARGIAn kontatu zenez, aparteko azterketa eskatzen du Espainiak: marroi iluna 120 kasutik gorakoei ematen zaielarik, eskualde askok hortik oso goragoko kopuruak dauzkate, hala nola Madrilek, Hego Euskal Herriak eta Errioxak.

Zazpi egun lehenago argitaratutako maparekin alderatuz gero, aste honetan Frantziak ere egin du okerrera nabarmen, eta dagoenekoz Hexagonoaren erdia baino gehiago dago marroi ilun. Okerrera jo du Errumaniak ere, bi mapak alderatuta ageri denez, Txekiak egin duen moduan. Erresuma Batuan ere –Ipar Irlanda barne– txarrerako joera nabarmena da. Alemania, Polonia eta Baltikoko hiru herrialdeetan antzeko egoeran jarraitzen dute, baina joan den astean kasu bakar  bat gabeko eskualdeak zeuzkan Suedian egoera gogortu egin da eta berdin Norvegian.

Irudi batetik bestera dagoen aldea ikustea lagungarri da ulertzeko osasun arduradunek bezala agintari politikoek azken egunotan adierazten duten kezka.