Asteazkenean jakinarazi ditu EH Bilduko bozeramaile Adolfo Araizek koalizioak egin duen kontsultaren emaitzak. Kontsulta egingo zela ezagutarazi zenetik izen-emateak %50 baino gehiago hazi dira, 1700etik 2.600era, eta eskubidea zuten pertsonen %73ak eman du bozka. 1.432 kidek egin dute bat inbestidura saioan Chiviteren hautagaitza abstentzio bidez ahalbidetzeari, bozken %75a. "Ez" bozkatuz PSNren lehendakaritzari ateak ixtearen alde 477 pertsonek egin dute, %25ak.

Araizek adierazi du EH Bilduren oinarri sozialari erabakia ez zaiola erraza izan: "Pertsona askok esan digute zail egin zaiela ezezkotik abstentziora pasatzea". EH Bildurekiko PSNren jarrera baztertzaileak haserrea piztu du oinarrian, eta gainera lehendakaritza emanez PSNri "hegalak" emateko beldurra dago. Zentzu horretan, eskuak libre dituztela adierazi du Araizek: "EH Bilduk ez du babesten gobernu akordioa, eta ez du inongo konpromiso politikorik gobernu horrekin. Momentu bakoitzean ikusiko dugu zer gertatzen den". Barne kontsultatik Nafarroako ezker subiranista indartuta atera dela defendatu du Araizek, erakutsitako "heldutasunagatik".

Lehendakari, ostiralean

Ostegunean hasi da Nafarroako lehendakaria hautatzeko inbestidura saioa. Hautagaiak PSN, Geroa bai, Izquierda-Ezkerra eta Podemos alderdien artean adostutako gobernu programa aurkeztuko du. Ondoren alderdi bakoitzak hitza hartzeko aukera izango du. Bozketa honetan EH Bilduren zazpi legebiltzarkideek ezezko bozka emango diote Chiviteri. Navarra sumak berbera egingo du (20 legebiltzarkide), eta PSNk (11), Geroa Baik (9), Izquierda-Ezkerrak (1) eta Podemosek (2) alde bozkatuko dute. Ostiralean, ordea, inbestidurarako bigarren saioan EH Bilduko zazpi legebiltzarkideetatik bik ezezko bozka emango dutela eta bost abstenitu egingo direla jakinarazi du Araizek. Orduan izendatuko du Nafarroako Legebiltzarrak Chivite lehendakari.

Osteguneko bozketa 20:30erako aurreikusi du legebiltzarreko presidenteak. Bigarren bozketa 24 ordu geroago egin behar da.

Legegintzaldi hitzarmena

Chivite lehendakari egiteko PSN, Geroa Bai, Izquierda-Ezkerra eta Podemos alderdiek legegintzaldirako hitzarmena itxi dute aurretik. Osatuko den gobernu koalizioan PSN, Geroa Bai eta Podemosek hartuko dute parte, Izquierda-Ezkerrak aukera hori baztertu ondoren. Gobernuak hamahiru departamentu izatea adostu dute hiru alderdiek: zortzi PSNren esku geratuko dira, lau Geroa Baik zuzenduko ditu, eta Podemosek bakarra.