Araba, Bizkaia eta Gipuzkoako Energia Berriztagarrien Lurralde Plan Sektorialaren tramitazioak aurrera jarraitzen du eta abenduaren 20an beste urrats bat eman du, behin-behineko bertsioa onartu baita, “jendaurreko informazio publikoan aurkeztu diren alegazioak kontuan edukita”.

Dokumentuak hainbat aldaketa dakartza, planaren hasierako onarpenarekin alderatuta. Egindako aldaketa batzuk behin behineko onarpenaren aginduak dakarren “aldaketen eranskin” batean jaso dira, ez ordea beste batzuk.

Eskala handiko berriztagarrien azpiegiturak kokatzen diren 27 eremuez gain, Lurralde Plan Sektorialean (LPS) beste eremu posible batzuk zehazten dira beren “gaitasunaren” arabera. Bada, gaitasun “ertaina” zuten eremu zabalak orain “altu” gisa daude izendatuta, eta horietan eskala handiko zentral eolikoak ezartzeko aukera dago –5 aerosorgailukoak edo 30 MW-eko potentzia baino gehiago dutenak–.

Gauza bera gertatzen da gaitasun “baxua” zuten eremu askorekin, orain “ertaina” baitute. Kasu honetan, bost aerosorgailu edo 30 MW-ko potentzia baino gutxiagokoak lirateke eolikoen zentralak, baina hala ere azpiegitura handiak izaten jarraituko lukete.

Udalerri askotan halako goranzko aldaketak egin dira, esaterako Hernaniko Pagoaga auzoan eta Onddi mendiaren inguruan, Euskal Herriko parke eoliko handiena eraiki nahi duten Urumeako mendien zonaldean hain justu. Beste toki batzuetan behera egin du berriztagarriak jartzeko gaitasunak, Olaberria, Bergara eta Gipuzkoa barrualdeko beste udalerrietako baserri-lurretan kasu, baina azken hauek salbuespenak besterik ez dira.

“Atrakzio efektua”

“Aldaketak justifikatu gabe daude” azaldu dio hedabide honi datu horiek aztertu dituen Mikel Alvarez eolikoen kontrako mugimenduko ekologistak. Bere esanetan, LPSaren aurrerapenean eolikoak jartzeko aukera zuten kokapenak askoz gehiago ziren; gero, planaren hasierako bertsioan horietako asko kendu zituzten; eta orain, behin-behineko bertsioko aldaketekin “nolabait itzultzen gara aurrerapen dokumentuan zegoen horretara”.

Alvarezen esanetan horrek enpresei bidea “errazten” die eta “atrakzio efektu” bat sortzen du, Araba, Bizkaia eta Gipuzkoako lurraldeak eskala handiko berriztagarrien azpiegiturak jartzeko libre baleude bezala.

Orain, dokumentua EAEko Lurralde Antolamendurako Batzordeari igorriko zaio, eta Ingurumen Azterketa Estrategikoa, berriz, Ingurumen Administrazioaren Zuzendaritzari. Eta behin betiko bertsioa onartzea espero du Jaurlaritzak, organo horietan “bidezko azterketak amaitu ondoren”, ohar bidez zabaldu duenez.

Aldiz, LPS hori onartu baino lehen tramitatzen hasitako eolikoen proiektu ugariek beren bidea jarraituko dute, planean agertzen ez diren eremuak ez baitira eolikoak jartzeko baztergarriak izango, eta itxura guztien arabera aurrera doazen proiektuak xedapen gehigarri baten bidez batuko zaizkie behin betiko dokumentuari, Alvarezek argitu duenez.