Bergarako Zezenak ganadutegiak bere abelburu guztiak (90) hil beharko ditu, tuberkulosi kasu bat atzeman dutelako. Gipuzkoako Foru Aldundiko Lurralde Oreka Berdea departamentuak baieztatu duenez, “hustuketa sanitarioaren” Europako protokoloa aplikatu da. Araudi horrek ezartzen duenez, behi-tuberkulosiaren intzidentziak % 1 gainditzen badu, kasu positibo batekin kontaktua izan duten abelburu guztiak sakrifikatu behar dira. Ganadutegiko arduradunek erabakia gaitzetsi dute: “Ez da bidezkoa infektatu batengatik animalia osasuntsu guztiak hil behar izatea”.

Bergarako Zezenak ganadutegia ezaguna da jaietako sokamutur eta errekortari saioetarako zezenak eta bigantxak dituelako. 90 abelburuak galtzeaz gain, kalterik handiena urteetan egindako  lortutako “genetika” galtzea dela adierazi dute sare sozialetan. “Bihotza, arima eta diru-zorroa jarri ditugu, eta orain dena pikutara doa”, adierazi dio Iñigo Almorza Bergarako Zezenak ganadutegiko arduradunak Diario Vasco-ri. Hala ere, konbentzimendu osoz jakinarazi du ez dutela etsiko: “Ez dugu amore emango, itzuli egingo gara, hutsetik hasi behar da berriro. Animaliak erosi eta leinu oso bat sortu. Aurrera egingo dugu”. 

Ez da aurten Gipuzkoan sakrifikatu behar izan den lehen azienda. Debako Marqués de Saka ganadutegiak 160 abelburu hil behar izan zituen otsailean, tuberkulosi agerraldi baten ondorioz. 

Bestalde, asteotan abere azokak debekatu dituzte Hego Euskal Herrian, behiei eragiten dien dermatosi nodular kutsakorra dela eta. Gaitzak Euskal Herriko behirik gaixotu ez badu ere, Nafarroako Gobernuak eta Eusko Jaurlaritzak azaroaren 30era arte debekatu dituzte abere azokak, prebentzio neurri gisa.