ARGIA.eus

2021eko abenduaren 02a

Bergarako erraustegi proiektuaren mahai-inguruak kezka handiagoa piztu du herritarrengan

  • Ekologistak Martxan taldeko ordezkariak Greene enpresari aurpegiratu dio “gezurretan” aritzea eta herritarrei “datuak ezkutatzea”; hondakinak pirolisi bidez tratatzearen kalteez ohartarazi du. Proiektuaren arduradunek, ordea, plantaren “onurak” azaldu dituzte, eta esan dute pirolisia ez dela errausketa.

Leire Artola Arin @aleirea
2021eko azaroaren 24a
Bergarako herritarrak Larramendin eraiki nahi duten hondakin plantaren aurka agertu dira. / Argazkia: @BergaraIkama

Goiena hedabideak argitaratu duenez, astelehenean Bergaran herritar ugari elkartu da Larramendiko industria poligonoan eraiki nahi duten erraustegi plantaren gaineko mahai-ingurura. Valogreen Paper BC SM enpresak paper fabriketako hondakinak gasifikazio bidez tratatzeko proiektuaren aldeko eta kontrako argudioak mahaigaineratu dituzte, azken asteetan herrian zalantza mordoa sortu baitu erraustegia eraikitzeko asmoak, eta haren aurkako ahotsak gailendu dira. Elkarretaratze jendetsua egin zuten proiektuaren berri izandakoan eta, Bergarako Udalarekin batera, alegazioak aurkeztu dituzte herritar askok.

Ekologistak Martxan taldeak lehenago salatu izan duenez, pirolisia deitzen dioten prozesua izatez errausketa da. Halaxe argitu du solasaldian Carlos Arribasek, Ekologistak Martxaneko hondakinen arloko arduradunak: “Legearen ikuspegitik pirolisia erraustea da, baldin eta pirolisian lortzen dituzun produktuak erre egiten badira, kasu honetan bezala”, azaldu dio Goienari. Greene (Valogreen Paper-en erroa) enpresako arduradunei leporatu die hasieratik “gezurretan” aritzea eta plantak izango lukeen jarduera “mozorrotzen” saiatzea, herritarrei eta udalari informazioa ezkutatuta. Talde ekologistaren esanetan, zarata eta usaina ez ezik, kutsadura eta gas toxikoak ere sortuko lituzke: dioxinak, furanoak eta metal astunak.

Aitzitik, guztiz aurkako azalpenak eman dituzte Greene enpresako Juan Jose Hernandez eta Enrique Araez arduradunek. Bergaran eraiki nahi duten plantan hondakinak “era jasangarrian” tratatuko lituzketela baieztatu dute, eta “materiala balorizatu” egingo luketela. Argudiatu dute prozesuak legearen eskakizun guztiak betetzen dituela. Haien esanetan, pirolisia ez da errausketa: “Teknikoki, errausketa material baten oxidazioa da. Pirolisia oxigenorik gabe eta tenperaturarekin egiten den eraldaketa da, non gasa eta ikatza lortzen den; eta hori baloritzatu daiteke”.

Urko Apaolazak ARGIAn jaso duenez, Ekologistak Martxanek, Zero Wastek, Gaia errausketaren aurkako munduko aliantzak baita Greenpeacek ere gauza bera diote: sistema pirolitikoa errausketaren hain antzekoa da, ezen erraustegi dei diezaiokeela.

Mahai-ingurura bertaratutakoak zalantza gehiagorekin eta kezka handiagoarekin atera dira; eztabaida eta denbora gehiago eskatu dituzte. Herritar asko ez ditu konbentzitu Greeneko arduradunek kontatutakoak eta datuak emateko galdegin dute. Enpresariek jakinarazi dute nahi duen orok proiektua bertatik bertara ezagutzeko aukera duela, eta “beharrezkoa izanez gero” hobekuntzak ezarri ahalko direla.

Udalaren baimena baliogabetuta

Uztailean Bergarako Udalak hirigintza-bateragarritasuna onartu zion proiektuari eta ingurumen-bateragarritasunaren onespenaren zain zeuden. Baina azaro hasieran baimena baliogabetu zuen udalak, iritzita enpresak hasieran aurkeztutako jarduera ez zetorrela bat geroago adierazitakoarekin. Goienak jakinarazi duenez, astelehenean Eusko Jaurlaritzan alegazioak aurkeztu ditu udalak, besteak beste, eraiki nahi den industriagune alboan etxebizitzak egonik, errauste planta ez delako onargarria ingurumenaren ikuspegitik. Proiektuaren tramitazioaren azken hitza ez dauka udalak, baizik eta Jaurlaritzak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Errausketa  |  Bergara  |  Errausketarik ez

Errausketa kanaletik interesatuko zaizu...
2021-11-04 | Zero Zabor
Bergaran elkarretaratzea deitu dute erraustegi asmoaren kontra

Ekologistak Martxan mugimenduak elkarretaratzea deitu du Bergaran azaroaren 4 iluntzerako, herri horretan paper fabriketako hondakinak gasifikazioz tratatzeko eraiki nahi duten plantaren kontra. Talde ekologista hori izan da Larramendi industrialdean eraiki nahi duten hondakin... [+]


Bergarako planta berria
Zuk diozu pirolisia, nik diot erraustegia

Bergaran paper lantegien hondakinak tratatzeko planta bat eraiki nahi dutela iragarri du Alacanteko Greene Waste to Energy S.L enpresak, Euskadiko Paperaren Klusterrak sustaturik.


2021-05-20 | Usurbilgo Noaua
GHK-k pardelak birziklatzeko zerbitzua abiarazteko sinadura bilketa

Gipuzkoako Hondakinen Kontsortzioak (GHK) pixohialak eta higiene-produktuak birziklatzeko zerbitzua abian jar dezala eskatzeko sinadura bilketari ekin dio Erraustegiaren Aurkako Mugimenduak.


2021-05-17 | Zero Zabor
Birziklapenaren Nazioarteko Egunean salatu dute Donostia dela Gipuzkoan gutxien birziklatzen duena

Birziklatzearen Nazioarteko Egunean protesta egin dute Donostiako Udalaren atarian, Errausketaren Aurkako Mugimenduak deituta, salatzeko Gipuzkoa osoan bere hiriburua dela gutxien birziklatzen eta zabor nahasi gehien sortzen duen udalerria. 


Irakurrienak
Azken albisteak
Argia buletina
Egunaren laburpena
zure e-postan
Eguneraketa berriak daude