Auzo pobrea gogaikarria da turismo aberatsarentzat
Auzo honetan [Bilbo Zaharra], pobreziaren, bazterkeriaren, langabeziaren eta irtenbiderik gabeko gazteen eta abarren tasa oso da altua. Orain, auzoko EH Bilduk batera interpretatzen dituen bi gertaera jazo dira: Mesedeetako kaleko 3. zenbakiko hotel berriaren irekiera eta justu ondoan dagoen osasun-etxe edo anbulatorioaren pixkanakako itxiera.
Udaleko PNVko taldeak hilabeteak daramatza Axel Hotels LGTBI hotel-kateko jabeak limurtzen. Izan ere, haren lehendakaria Euskalduna Jauregian hitzaldi bat ematera gonbidatu zuten, guri sinestarazteko Bilbo gay friendly bat eraikitzen ari direla; hori bai, tokiko LGTBI elkarteek diote udalak ez dietela kasurik ere egiten. Dena dago eskrupulorik gabeko plan merkantilista baten barnean.
Baina hori ez da dena. Erdi- eta goi-klaseko jendearentzako hotel bati oso irudi txarra emango lioke ondoan anbulatorio bat egoteak, auzoko jendea ―jendaila, haientzat― etengabe sartzen eta irteten. Horrexegatik nahi dute Mesedeetako anbulatorioa itxi, kontuan hartu gabe inguruko nagusiek, lehen mailako arretako mediku-kontsulta bat izateko, Miribillako zentroraino joan beharko dutela.
Guk, auzoko EH Bilduko talde gisa, exijitzen diogu Bilboko udalari eta Osakidetzari ez bakarrik Mesedeetako anbulatorioa ez ixtea, baizik eta zerbitzua osasun-baliabide eta langile gehiagorekin sendotzea. Aldarrikapen horren harira, bat egiten dugu Bilbo Zaharreko, San Frantzisko eta Zabalako Taldeen Koordinakundearekin, eta haren "MESEDEETAKO OSASUN-ETXEA HUSTEAREN AURKA" sinadura-bilketan parte hartzera animatzen ditugu auzokideak eta, oro har, bilbotarrak, zeina azaroaren 21era arte izango baita.
Bidali zure iritzi artikuluak iritzia@argia.eus helbide elektronikora
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
