Europako Batzordeari teknologia biometrikoen erabilera erregulatu eta  arautzeko eskatu diote, oinarrizko eskubideekiko interferentzia bidegabeak saihesteko. Bereziki, legerian eta praktikan, biometriaren erabilera bereizi gabeak edo arbitrarioki fokalizatuak, legez kanpoko zaintza masiboa eragin dezaketenak debekatzeko eskatzen dute. Reclaim Your Face europar mugimenduak 26.645 pertsonen sinadurak lortu ditu eta webgunearen bitartez sinatu daiteke.

Mugimenduaren esanetan, frogatuta dago Europar Batasuneko estatu kideetan eta Europar Batasuneko agentzietan zaintza biometriko masiboaren erabilera. Batzuek EBko legeria urratzea ekarri dute datuen babesari dagokionez, eta pertsonen eskubideak bidegabeki murriztea, pribatutasuna, adierazpen-askatasunerako eskubidea, manifestazioa egiteko eskubidea eta diskriminaziorik ez jasateko eskubidea barne. “Zaintza biometrikoa, profilak egitea eta iragartzea mehatxu dira zuzenbide-estatuarentzat eta gure oinarrizko askatasunentzat”, azpimarratu dute.

Reclaim Your Face mugimendua

Mugimendu honek biztanleria monitorizatzeko erabiltzen diren datu biometrikoei buruzko eztabaidan jendearen ahotsak biltzen ditu. Datu konfidentzial horiek zergatik erabiltzen diren galdetzen du eta pertsonen askatasunek espazio publikoetan duten erasoei buruzko alarma pizten dute.

Mugimenduak hiru helburu nagusi lortu nahi ditu: Denek askatasunez eta beldurrik gabe hitz egiteko aukera duten eremu publikoak; ulertzeko zailak diren hitzen atzean edo enpresa pribatuekin egindako kontratuen atzean politikariak ezkutatzen ez diren hiriak; eta gobernuek herriari kontuak ematen dizkioten herrialdeak lortzea. 

Datu biometrikoak

Datu biometrikoak datu pertsonalak dira, gure gorputzen eta portaeren identifikazio bakarra ahalbidetzen dutenak. Nortzuk garen jakiteko informazio sentikorra ematen dute. Adibidez, aurpegiak ezagutzeko iragarpenak, baita begiak, zainak, ahotsak, teklatuan ibili edo idazteko modua, eta askoz gehiago ere.

Gobernuek, polizia-indarrek eta enpresek grabazio-gailuak (adibidez, CCTVko kamerak) eta aurpegia ezagutzeko softwarea erabiltzen dituzte pertsonen datu biometrikoak biltzeko. Leku batetik bestera utzitako arrastoa jarraitu dezakete, pertsonen ezaugarri bakanak erabiliz etengabe identifikatzeko.