Ertzaintzak 2020an 241 gorroto-delitu erregistratu zituen, aurreko urtean baino bi bider gehiago (105 kasu zenbatu zituen 2019an). Horietatik %48,5 (117 kasu) arrazistak edo xenofoboak izan ziren, %21 (50 kasu) sexu-orientazioarekin eta sexu-identitatearekin lotuta zeuden, %12 (29 kasu) dibertsitate funtzionalarekin eta %10etan (24 kasu) oinarria ideologia eta joera politikoa izan zen.
Eusko Legebiltzarrean aurkeztu dute maiatzaren 31n Euskadiko Gorroto Gertakariei buruzko 2020ko Txostena. Lan hau EHUko Jon Mirena Landak eta Enara Garrok zuzendu dute eta bertan aztertu dituzte Ertzaintzak iaz erregistratutako 241 gorroto-delituak.
2020an egindako gorroto-delitu gehienak arrazistak izan dira: 117 kasu guztira (gorroto-delitu guztien %48,5) eta aurreko urtearekin alderatuta bikoiztu egin da, 2019an baino 61 kasu gehiago izan baitira. Kolektiborik kaltetuenak dira arabiarrak (29 kasu, eraso arrazisten edo xenofobo guztien %25), beltzak (24 kasu, %20,5), nazionalitateagatik edo jatorriagatik eraso egin zieten pertsonak (25 kasu, %20,3), latinoak (17 kasu, %14,5), ijitoak (9 kasu, %8) eta asiarrak (1 kasu, %1).
Bigarren jazarrien den multzoak sexu-orientazioarekin eta sexu-identitarekin du lotura: erregistratutako gorroto-delituen %21 jaso dute (50 kasu). Hemen ere igoera nabarmena izan da, 2019an baino 37 kasu gehiago baitira erregistratutakoak. Kolektibo erasotuenak izan ziren gayak (31 eraso) eta transgeneroak (10 eraso), eta lesbianak (3 eraso).
Txostenak ondorioen atalean dio 2020an nabarmen gora egin dutenak aniztasun funtzionalarekin lotutako gorroto delituak izan direla: 29 kasu izan dira, delitu guztien %12a, eta 2019an baino 23 kasu gehiago. Hauen artea gorroto-delitu gehien jasan zituzten pertsonak desgaitasun mentala zutenak izan ziren (9 kasu, dibertsitate funtzionalagatik egindako eraso guztien %31), eta ondoren desgaitasun fisikoa zutenak (5 kasu, %17), desgaitasun psikikoa zutenak (4 kasu, %14) eta sentsoriala zutenak (4 kasu, %14).
Gorroto-delituen %10etan (24 kasu) azpian ideologia eta orientazio politikoa egon zen, eta honek ere igoera nabarmena izan du: %33, 6 kasu gehiago alegia.
Delitu guztien %7k (16 kasu) biktimaren sexuarekin zuten zerikusia eta gainerako %2k: aporofobiarekin (2 kasu), adinarekin (1 kasu), antisemitismoarekin (1 kasu) eta sinesmen eta praktika erlijiosoekin (1 kasu).
2020an gorroto-delitu gehienak (%38,6) kalean gertatu ziren eta, kasu askotan, biktima bizi zen lekuaren inguruan. Kasuen %25a, berriz, etxean bertan izan ziren. Kasuen %8 baino ez ziren gertatu ostalaritzako, aisialdiko edo antzeko lokaletan, txostenaren arabera, "pandemiaren ondorioz ezarritako murrizketengatik". Ia ostalaritzako eta aisialdiko eremuan adina gorroto-delitu egin dira 2020an Interneten: kasu guztien %7,5 dira.
Txosten honek aztertutako kasuen arabera, biktimen %59 (203 pertsona guztira) gizonezkoak izan ziren eta %41 (143 pertsona) emakumeak. Jatorriz, gehienak euskaldunak, 150. Eta bataz beste biktimen adina 28 urtekoa izan zen.
Inputatutako pertsona gehienak ere gizonak dira (115, guztien %72,5) eta 44 dira inputatutako emakumeak (%27,5). Jatorriz erasoa egin duten gehienak euskal herritarrak dira, 86 guztira (erasotzaile guztien %85). Eta erasotzaileen bataz besteko adina 37 urte ingurukoa izan zen.
Hainbat herritarri suzko arma batekin tiro egin ostean bi pertsona zauritu zituzten udaltzainek, horietako bat larri, pasa den martxoaren 21ean, Barakaldon. Tirokatuak kalean bizi ziren magrebtar jatorrikoak izatea ez dela kasualitatea dio 77 elkartek sinaturiko adierazpenak:... [+]
Ostegun goizeko 8:00etatik 12:20era Polizia operazio handia egon da Donostiako Martutene auzoko etxe okupatu batean. Espainiako Poliziak, Ertzaintzak eta Udaltzaingoak elkarrekin egin dute operazioa, “atzerritarren bulegoaren operazioa” dela azaldu dute. Donostiako... [+]
Arrazakeria, diskriminazioa eta islamofobia salatu ditu langileak, eta Iruñeko Lan Ikuskaritzaren aurrean elkarretaratzea egin dute, SOS Arrazakeriak eta LAB sindikatuak deituta. Ikuskaritzak salaketa itxi du, eta onartu egin du Misericordia enpresaren argudiaketa, dioena... [+]
Donostiako Egia auzoan, azken hilabeteetan, bizilagunen artean segurtasunaren inguruko kezka handitu da, eta “beldur eta urduritasunak duen garrantzia aitortu eta sentimendu horiei lekua” egin behar zaiela aldarrikatu dute.