Altsasukoak askatzeko eskatuz elkarretaratzea egin dute espetxe aurrean
Gaur hasiko dira festak Altsasun eta Iruñeko espetxean izan dira herritar zenbait preso diren gazteen askatasuna aldarrikatuz. Herriko jaietan herrian nahi dituztela adierazi dute.
Altsasuko bizilagun talde bat Iruñeko espetxe aurrean elkartu da gaur herriko jaien bezperan Altsasuko gazteen askatasuna aldarrikatzeko. Horrela, jaietako txupinazoa aurreratu dute, txaranga eta guzti eramanez.
Bideoa: Ahotsa.info
Altsasuko auzian preso dauden zazpi gazteak Euskal Herriko espetxeetan dira jadanik. Espainiako Espetxe Zuzendaritzak abuztuan hasi zituen mugimenduak: 24an, Julen Goikoetxea eta Jon Ander Cob Zaballara eraman zituzten, eta, astebete beranduago, Aratz Urrizola ere hara, eta Adur Ramírez de Alda, Iruñekora. Madril inguruko espetxeetan zeuzkaten zazpiak preso.
Ekainean, Espainiako Auzitegi Nazionalak bi eta hamahiru urte arteko zigorra ezarri zien zortzi auzipetuei; guztira, 79 urte, 2016an Altsasun taberna baten kanpoko aldean guardia zibil batzuekin eta haien bikotekideekin izandako liskar batengatik. Ainara Urkijo zigortua ez dago preso, bi urteko kondena jaso zuela eta. Defentsak aurkeztua du epaiaren aurkako helegitea, erabakia «neurriz kanpokoa» delakoan. Fiskaltzak ere aurkeztuta du, ez dituztelako zigortu «terrorismo» delituagatik. Uda ondorengorako espero da epaileen deliberoa.
>>> Artikulu hau CC-BY-SA lizentzia baliatuta ekarri dugu Euskalerria Irratiaren webgunetik.
Ostegun honetan estreinatu da Madrilen 2016ko Altsasuko gazteen atxiloketa eta auzipetzea ardatz dituen antzezlana La Abadia antzokian, Voxek zentsura kanpaina handia egin ondoren.
Giza Eskubideen Europako Auzitegiak ez du aintzat hartu Altsasuko gazteek epaiketa bidezkoa izan zuten aztertzeko eskakizuna. Auzipetutako gazteetako batek, Iñaki Abadek, eman du jakitera berria.
Espainiako Auzitegi Nazionalaren ebazpenean dago oinarritua erabakia eta dioenez, Altsasuko gazteak zigortu zituen ebazpenean ez zen terrorismorik aipatzen, beraz, ez administrazioak ez Auzitegi Nazionalak ezin dute terrorismoaren biktimen kalte ordainik onartu.
