Adingabe baten irudiak YouTube web-orritik ez ezabatzeagatik irekita dagoen Kote Cabezudo argazkilariaren auzia berriz itzuliko da instrukzio fasera. Cabezudok irudi horiek Internetetik kentzeko agindu judiziala dauka, baina ez du halakorik egin eta asteartean hortaz auzia du zabalik bere kontra. Asteartean egin zuten auzi zaioa Donostiako Zigor Arloko epaitegi batean, ateak itxita, eta auziko iturriek jakinarazi dutenez berriz itzuliko da instrukzio fasera auzia.

Antza, aldeek behin betiko ondorioak aurkezteko unean Cabezudoren abokatuak behin-behineko defentsa idatzia aldatzea erabaki du, eta auzibidea baliogabetzeko eskatu. Eskaera aintzat hartu du magistratuak, eta ondorioz auzia instrukzio fasera itzuliko da. Epaiketaren data berri baten zain geratu dira aldeak.

Honekin, laugarren aldia da auzia atzeratzen dena. 2021eko martxoan atzeratu zuten lehenbizikoz, defentsak eskatu baitzuen auzi nagusiaren dokumentu bat eranstea. 2021eko urrian bigarrenez atzeratu zuten, deklaratzera deitutako peritu bat oporretan zegoelako. Eta aurtengo martxoan argazkilariaren aurkako auzi nagusia egiten ari zirelako atzeratu duten auzia beste behin.

Auzi nagusian 28 urtetik gorako espetxe zigorra agindu zuten Cabezudorentzat. Bortxaketa, sexu abusu, haur pornografia eta iruzur delituak leporatu dizkiote. Auzi nagusi horrek barnebiltzen ez dituen arrazoiengatik baditu bere aurkako bestelako auziak ere indarrean argazkilariak, asteartekoa kasu. Auzi nagusiaz aparteko kausa horien ondorioz, espetxean dago egun.