63 pertsona hil dira gutxienez Cabo Verdeko kostaldeko uretan, Afrikan, Kanariar Uharteetan barrena Espainiako Estatura sartzeko asmotan zirela, jakinarazi du Migraziorako Nazioarteko Erakundeak. Senegalgo Gobernuaren esanetan, guztira 101 pertsona zeuden ontzian Fass Boyetik (Senegaldik) abiatu zenean uztailaren 10ean.

Migraziorako Nazioarteko Erakundeko bozeramaile den Safa Msehlik azaldu du oraindik ezin direla jakin hondamendiaren arrazoi zehatzak, baina "hilabetez itsasoan egoteak ondorio larriak” izan ditzakeela; esaterako, hipotermia eta deshidratazioa.

“Itsasoko heriotza hauek ohikoak dira, izan Atlantikoan izan Mediterraneoan, eta gerra zein miseriatik alde egin eta bizi hobe bat lortzeko helburua duten ehundaka pertsonen desesperazioa erakusten dute”, dio erakundeko bozeramaileak. Bere ustetan, bide “seguru eta erregularrak” eraiki behar dira migratzaileentzat, trafikatzaileek egoera "probestu" ez dezaten.

Etengabeko heriotzak itsasoan

Ekainaren erdialdean jakin genuen Greziako uretan 700 errefuxiatu zeramatzan itsasontzi bat hondoratu zela, hildako andana eraginez. Horri aurre egiteko borondate gutxi erakutsi zuten agintariek, Greziako kostazainen bertsioa zalantzan jarri baitzuten.

Bide beretik, immigrazioa kontrolpean izateko Erresuma Batuak itsasontzi-kartzela jarri du martxan, guztira 500 pertsona preso egon daitezke bertan. Euskal Herrian ere badira antzeko jazarpen kasuak; ekainaren 8an argitara atera zen Espainiako Poliziaren Irungo taldeak migratzaileak atxilotzeagatik jai egunak eman nahi zituela.