Munduko ekonomia ahultzen ari da potentzien arteko gerra komertzialek hauspotuta eta azken urteetako hazkunde zikloa amaitzear egon liteke, ATTAC erakundeko Marco Antonio Morenok idatzi duenez. 2018ko munduko BPGaren hazkundea hartu du horren seinaletzat: %2,1 hazi zen iazko azken hiruhilekoan, urte bereko erdialdean jasotako %4ko hazkundetik urrun.

Ez hori bakarrik, jarduera ekonomikoak beherantz doaz AEBetan, Erresuma Batuan, Kanadan eta Eurogunean, Alemanian eta Italian barne. Ekonomia Lankidetza eta Garapenerako Erakundeak astelehen honetan kezkak areagotu ditu, erakunde horretako kide diren estatu gehienetan jarduera ekonomikoak mantsotzen ari direla iragarriz.

Morenoren ustez, hainbat datu begiratu daitezke, baina emaitzen tamainak erakusten du, oro har, ekonomia nahiko azkar ari dela indarra galtzen. Aste honetan begirada guztiak Txinan jarrita egongo direla ere nabarmendu du: Asiako erraldoiak argitaratu behar ditu txikizkarien salmenta datuak, inbertsioekin lotutakoak, baita kreditu eta ekoizpen industrialari dagozkionak ere.