Directak jaso duenez, TPSK-ko bozeramaleak, Andres García Berrio abokatuak, ezinbestekotzat jo ditu Europar Batasuneko isunak eta nazioarteko presioa, immigranteen berehalako itzulerak eta tratu txarrak eteteko.

“Espainiar Estatuak ez du lanik egiten torturak saihesteko, eta ez du interesik horri amaierarik emateko”, salatu du.

Horrez gain, inkomunikatutako atxiloketak indargabetu behar direla esan du Koordinadorak, horrelakoetan ematen direlako tortura salaketa gehien.

TPSK-ren estatu mailako bozeramaleak, Jorge del Curak, salaketa horien igoera “etengabekoa” izan dela esan du. “Koordinadora lanean jardun den hamar urteetan 6.621 tortura salaketa eta 833 zaintzapeko heriotza izan dira. Kondenak, ordea, 752 baino ez, erdiak faltak, ez delituak”.

Torturagatik kondenatutako polizia ugari indultatzen dituztela ere salatu du Del Curak.