ARGIA.eus

2021eko azaroaren 30a
Ilazki Gainza Giraldo. Kalakaria

“Edozein proiekturen garapena norbere emozioei helduta doa. Sentimenduek edozer baldintza dezakete”

  • Berari aldaketak asumitzea kostatzen zaiola aitorturik, jendartean hain errotua dauden hainbat ohitura aldatzeko asmoz sortu zuen Kalaka proiektua Ilazki Gainza Giraldok (Donostia, 1986). Nerea Uria Gigorro lankideak eta biek aholkularitza, diseinua, komunikazioa eta formakuntza feminista eskaintzen dituzte. Motxila lan esperientzia eta konfiantzaz beterik, ilusioz begiratzen du aurrera Gainzak.

Aitziber Zapirain Etxaniz
2021eko urriaren 24a
"Elkarrizketarako hutsunea somatzen dut nik. Topaketa handietan eztabaidak ematen dira, baina egunerokoan ez dago horrelakorik. Kontzientzia izatetik harago urratsak emateko hautua egiteko eta bidea zinezkoa izan dadin solasaldiak behar dira". (Argazkia: Irantzu Pastor)

Kalaka, kalakarako tresna bat baino gehiago da ezta?
Saiatzen gara! Komunikazioa eta berdintasuna ardatz harturik zerbitzu batzuk eskaintzen hasi ginen orain dela sei urte. Denborarekin ordea, egoera eta beharren arabera, zerbitzu horiek zehazten eta garatzen joan gara eta azken urteetan berdintasun planak, formakuntzak, aholkularitza, komunikazioa eta diseinua eskaintzen ditugu, besteak beste. Uztargarriak diren edo uztargarriak egiten ditugun arlo ezberdinak dira. Mimoz egiten dugu lana. Bezeroa enpresa handia edo txikia izan, kooperatiba hasi berria edo komunikabidea, gure jarrera berdina izan ohi da. Taldera egokitu eta haien helburua betetzeko egiten dugu lan.

2015ean sortu ginenetik urte bakoitza erronka eta sorpresa ezberdinez beterik agertu zaigu. Gure aldetik dena ematen dugu, denak aurrera egin dezan. Garapen bidea oso polita izaten ari da, aberatsa, baina baita gogorra ere. Iaz, adibidez, Pausso izeneko egitasmoa garatu genuen Gipuzkoako Foru Aldundiarentzat, beste kooperatiba batzuekin elkarlanean. Txiki sentitzen ginen horretarako, baina lortu izanak konfiantza handia eman digu.

Argazkia: Irantzu Pastor

Gero eta talde gehiago daude halako zerbitzuak eskaintzen. Zaila da lekua egitea?
Bai, oso zaila da. Gu oso txikiak gara, bi lagun besterik ez. Baina gainontzekoekin elkarlanean aritzeko gogo eta beharra sumatu dugu hasieratik. Lehiaren izenean ateak itxi ordez, eskuak batuz ateak zabaltzen direla uste baitugu. Horrez gainera, gurea proiektu feminista izango zela argi genuen hastapenetik, eta osasun izurriteak hain modan jarri duen “bizitza erdigunean” leloa hasieratik aplikatzen dugu. Hori da gure oinarria. Norberaren erritmoak errespetatzen ditugu, izan lankideenak ala bezeroenak, ez dugu inor ez ezer bazterrean uzten. Eta uste dugu bezeroak hori sumatu eta eskertu egiten duela.

2017an elkar entzun eta laguntzeko helburua duen Ekion emakume ekintzaileon sarea sortu genuen, gure arteko iritzi, aholku, euskarri, baliabide eta esperientzien trukaketak euskaraz egin ahal izateko. Gure proiektua garatzerakoan faltan sumatu genuen espazioa da. Emozioek garrantzia handia dute lan honetan. Norbere emozioei helduta doa edozein proiekturen garapena. Sentimenduek edozer baldintza dezakete. Beraz, elkarren eta norberaren zaintzari garrantzia ematea ezinbestekoa da Kalakan.

Zein da formakuntza feministaz duzuen esperientzia?
Azken urteetan modan jarri dela dirudi. Gaia normalizatu egin da eta politikoki zuzena da berdintasunaren alde egitea,  baina zoritxarrez errealitatea bestelakoa da. Formakuntza saioetan erresistentzia askorekin egiten dugu topo. Beti uste dugu besteak direla matxistak eta gurea jarrera egokia dela. Halako saioetan, ordea, berehala ohartzen gara oker gaudela. Gaur egun, kontzientzia feminista izatea ez da nahikoa. Enpresa edo erakundeekin jarduten dugunean, entitatearen marka ahaztu eta bertako langileekin, pertsonekin aritzen gara. Enpresak baino pertsonok ekin behar dugulako. Hortik hasten da aldaketa.

Emakume zuri eta mendebaldarrok ere baditugu pribilegioak…
Horren inguruan ezagutza falta handia dagoela esango nuke. Batzuetan ez dakigu pribilegio horiek zein diren ere, baina ezin ditugu inola ere alde batera utzi. Elkarrizketarako hutsunea sumatzen dut nik. Topaketa handietan, mahai-inguruak eta eztabaidak ematen dira, baina egunerokoan ez dago horrelakorik. Sare sozialetan ere bakoitzak gurea botatzen dugu, pantailak eskaintzen duen distantziatik, baina non dago parez pareko solasaldia? Horrek eman ohi ditu fruituak. Kontzientzia izatetik harago urratsak emateko hautua egiteko eta bidea zinezkoa izan dadin solasaldiak behar dira. Pribilegioen kontua erresistentziaz beterik baitago. Hala ere, zu eta ni honen inguruan aritzea, ondoren norbaitek irakur dezan, bada zerbait.

Hezkuntzan jartzen da pisua baina harago ere badago zer eginik, ala?
Eskoletan eta ikastoletan berdintasun planak garatzen ditugunean “ezin dugu dena egin” esan izan digute, eta egia da. Berdintasun plana dago batetik, baina baita ingurugiroa, euskararen zabalpena, inklusibitatea… Borondate ona ikusten dugu hezkuntza zentroetan, baina gainezka daude. Hezkuntzatik kanpo ere badago non eta nola ekin gainera! Aisialdian, etxe barruan… Haurrei liburu bat eskaintzean, idazlea emakumea izan dadin saia gaitezke, gauza bera film edo telesailekin. Emakume sortzaile ugari dago, erreferente bilaka ditzagun bada! Denona da ardura.

Edozein talderentzat balio dute berdintasun planek?
Entitate bakoitzaren egoerara egokitzen gara. Enpresa txikiek, adibidez, ez dute derrigorrez berdintasun plan handi bat egin behar. Askotan saio batzuekin nahikoa izaten da. Asko aurreratu daiteke txikitik hasita, tailer praktiko gutxirekin. Gogoa duenak egiten du ahalegina. Taldean kafea hartu ostean kikarak garbitzea eta bileran hitza errespetatzea, adibidez; tontakeriak dirudite, baina oraindik ere hauxe da errealitatea Euskal Herrian ere.

Aldaketarako pausoen laguntzaile
Giza zientziak eta komunikazioa ikasi arren, kazetaritzako presioa eta presak baztertzea erabaki zuen eta berdintasun arlora bideratu ditu bere bizitza eta proiektu profesionala. Langabezian, ez aurrera ez atzera “denbora gehiegi” pasa ostean, Kooperatzen espazioa bere ametsa zenaren laborategi bilakatu zen. Bakarrik bidaiatzen ikasi duen bezalaxe ikasi du kooperatiba bat martxan jarri eta aurrera ateratzen. Bi urtez Mexikon bizitzeko esperientzia bildu arren, Euskal Herria du “lindo” eta “querido”.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Feminismoa

Feminismoa kanaletik interesatuko zaizu...
2021-11-30 | ARGIA
Jatorri latinoamerikarreko biztanleak EAEn, kolektibo gazte eta feminizatua

Latinoamerikar jatorriko EAEko herritarrak aztertu ditu Ikuspegi Immigrazioaren Euskal Behatokiak, bere azken argitalpenean. EAEko etorkinen artean, kolektibo ugariena da latinoamerikarrena, gehienbat emakume gazteak dira eta okupazio-tasa handia dute.


Ni-tik zu-rako jauzia, Tupustean

Lehenbiziko komiki antologia argitaratu eta urte parera, bigarren liburukia kaleratu berri du Tupust! kolektiboak. Donostiako Koldo Mitxelena Kulturunean liburua aurkeztu ostean, labetik atera berri den lanari buruz gehiago konta diezaguten jarraitu diegu Komikigunera... [+]


‘Lumineszenteak’ lanean diskurtso nagusietan ikusezinak diren emakumeen historiak bildu dituzte

“Lumineszenteak: Emakumeen aurkako indarkeria ikusezinak eta erresilentzia historia zenbait” liburua izango dugu hizpide,  Bertan diskurtso nagusietan oihartzunik eta lekurik ez duten emakumeen testigantzak nahiz argazkiak jasotzen ditu. Igone Mariezkurrena... [+]


2021-11-26 | Leire Artola Arin
"Indarkeria matxistarik gabeko bizitzak" ozen aldarrikatu dituzte kalean

“Promesa faltsuez nazkatuta” daudela azpimarratu dute milaka emakumek, eta erakunde guztiei eskatu diete politika feministekin “konprometitzeko”. Indarkeria matxistak hil dituen andre guztiak gogora ekarri dituzte.


Emakumeek Hondarribiko historian utzitako aztarna, hamar biografiatan

Historiaren joan-etorrian ahaztuenak emakumeak izan direla-eta, Hondarribiko historiari arlo ezberdinetan ekarpena egin dioten hamar emakumeren biografiak bildu dituzte. Emakume bakoitza hirigune historikoko puntu bati lotuta agertzen da, eta hori aprobetxatuz, paseo herritarra... [+]


Irakurrienak
ASTEKARIA
2021eko urriaren 24a
Azken albisteak
Argia buletina
Egunaren laburpena
zure e-postan
Eguneraketa berriak daude