Erresistentzia nudista

  • Eremu nudistetan bainujantzia daramatenen gorakada, nudismoa debekatzen duten udal-ordenantzak, emakumeen aurkako sexu-jazarpena eta seinalizazio eza gisako erronkei aurre egiteko ekintza-plana lantzen ari da Kataluniako Naturismo Kluba.

Argazkia: Associació Club Català de Naturisme.

2021eko abuztuaren 05an - 10:50
Azken eguneraketa: 12:53

"Nudismoa osasun egoera delikatuan dago. Nudisten ehunekoa ez da hazi azken urteotan, eta asko dira nudisten leku tradizionaletara joateari utzi diotenak, gaur egun bainujantzia daramaten jendez lepo daudelako. Mugimendu gisa dugun erronka da. Horrez gain, badirudi, irekitzen beharrean, gizartea ixten eta atzera egiten ari dela, gorputzei dagokionean kontserbadoreagoa dela, eskuinera jotzen ari dela, eta biluztasuna ez dela onartzen". Kataluniako Naturismo Klubeko (CCN) lehendakari Segimon Roviraren gogoetak dira. 500 bazkide baino gehiago dituen irabazi asmorik gabeko elkarte hau nudismoa praktikatzen dutenen eskubideen alde borrokatzen da Katalunian 1977az geroztik.

Ez dira nudismoarentzat garairik onenak. Eremu nudistetan bainujantzia daramaten pertsonen gorakada, biluztasuna debekatzen duten ordenantzak Tarragona, Bartzelona edo Castell Platja d'Aro gisako hirietan, seinalizazio argi eta homogeneorik ez izatea eta nudismoa praktikatzen duten emakumeen aurkako sexu-jazarpenari gehitzen zaie begiluzeen presentzia. Askatasun komuna, naturarekin harmonia eta goputzen onarpena ardatz dituen praktika honen erronka nagusiak dira.

Horregatik ari da elkarte hau ekintza-plan nudista bat garatzen bazkideei, erabiltzaileei, jarraitzaileei, administrazioari eta, oro har, gizarteari zuzendua. Bertan proposatuko dituzte hainbat frontetatik kezkagarritzat jotzen duten dinamika iraultzeko ekintza eta ildo estrategikoak.

Proposamen sorta
Proposamenetako bat da Kataluniako tradizio nudistako hondartzak seinaleztatzeko kartel generikoa sortzea, piktograma edo logoekin, eta hainbat hizkuntzatan azalpenak emanez

"Mundu guztiak nahi duen bezala bainatu eta eguzkia edonon hartu ahal izatea litzateke egokiena: biluzik, toplessean edo bainujantzi osoarekin. Baina hori, gaur-gaurkoz, gizartearen zati batek ez luke onartuko (…). Azken urteotan, tradizio nudista duten hondartza batzuetan, familia osoak edo gazte-talde ugari ikusten dira, guztiak bainujantzia soinean. Horrek nudista asko deseroso sentiarazten du. Nudismoa espazio publiko guztietan legala dela eta ez direla hondartza nudistak seinalizatu behar pentsatzea utopia da, eta gaur egun ez da bideragarria”. Hala diote 2021eko ekintza-plan nudistan. Proposamenetako bat da Kataluniako tradizio nudistako hondartzak seinaleztatzeko kartel generikoa sortzea, piktograma edo logoekin, eta hainbat hizkuntzatan azalpenak emanez. "Seinalizazioa garrantzitsua da nudistei segurtasuna transmititzeko eta gainerako erabiltzaileei hondartzen tradizio nudistaren berri emateko. Kartelek ez dute ziurtatzen nudismoa mantentzea, informazio ekintzekin osagarritu behar dira", dio CCNk.

Beste proposamen bat da Kataluniako hondartza nudistetan koordinatuko den boluntario sarea  osatzea. Beren egitekoa hondartza dinamizatzea izango da, urteko garbiketa-eguna edo naturismoaren eguna antolatzea, baita hondartzaren kontserbazioa eta seinalizazioa zaintzea ere, datuak jaso eta edozein gorabeheraren berri ematea. Azkenik, eta etorkizuneko erronka gisa, 2021 honetan Nudismoari buruzko Kongresua egin nahi dute, baita sare sozial nudista bat osatu ere, informazioa partekatzeko eta nudisten arteko eztabaidagune izateko.

Erakundeentzat proposamenak
Mar Bella hondartzan jarri duten afixa.

Halaber, CCNk administrazioari, aldundiei eta udalei zuzendutako neurriak ere proposatu ditu, nudismorako eskubidea aitortzeko politikak eta keinuak egin ditzaten. Generalitateko eta Tarragonako, Bartzelonako eta Gironako Foru Aldundietako Turismo arduradunekin harremanak prestatzen ari dira, hondartza nudisten sustapena eta gida nudista ofizial bat sortzeko.

Planaren arabera, "nudismoa debekatzen duten ordenantzak atzera bota behar dira, gobernu aurrerakoiak dituzten udalekin harremanetan jarriz eta debekuaren akatsaz jabe daitezen saiatu behar da –2018ko Kataluniako sindikoaren ebazpenari erreferentzia eginez–, Katalunian naturismo-nudismoa defendatu eta sustatu behar da".

Ebazpen hori Kataluniako Naturismo Klubak eginiko kexei emandako erantzuna izan zen eta bertan  sindikoak sei gomendio planteatu zituen udalerrientzat, helburu jarrita udalerri guztietan nudismorako eskubidea eta emakumeek lasaitasunez egiteko aukera izan zezaten, begiluzeen presentziarik gabe. Emakumeen aurkako sexu-jazarpenari nola egin aurre, horixe da kudeatzeko gairik zailenetakoa. Roviraren ustez, ez dago irtenbide argirik. "Proposatzen dugu hondartzetako ohiko erabiltzaileak izatea akosatzailearekin hitz egin eta joatera gonbidatuko dutenak, eta uko eginez gero, poliziari deitzea".

Ahalduntze nudista

CCNreno planaren zati handi bat nudismoa gizartera zabaltzeko ekintzek hartzen dute. "Nudismoa normalizatzeko kanpainak egin behar dira, nudismoa zer den ezagutaraziz eta topikoak gezurtatuz. Nudismoa benetan ezagutzen ez duen gizartearen zati handiago batengana iritsi behar da". Hala ere, egungo erabiltzaileen ahalduntzea ez da ahaztu behar. "Nudistei beren eskubideez hobeto informatu behar zaie. Espazio publiko guztietan nudismoa egiteko eskubidea dugu, nahiz eta seinalizatuta ez egon (hori debekatzen duten ordenantzak dauden lekuetan salbu)", jasotzen du planak. Barnealdeko nudismoa sustatzeko apustua ere egiten da, mendian eta ibaietan, bai bainatzeko lekuetan, bai txango eta mendi-ibilaldietan praktikatzeko.

Plan hau, azken batean, erresistentziarako deia da, beren gorputza oraindik ere arropa eta osagarririk gabe eraman nahi dituztenentzat, tradizio nudistako hondartzak defendatzen dituztenentzat – gaur egun bainujantzia daramaten jendez beteak–, edo leku berriak askatzen dituztenentzat. Keinu sinple bat egitea nahikoa da, baina gaur egun oso konplexua da: arropa kentzea.

Joan den udan Joan de Lomas naturistak hala zioen: "Beren hondartzak ehunekin okupatzen dituztela kexu direnei esango nieke, ez uzteko, joateri ez uzteko, izan daitezela haiek biluztasuna hor dagoela erakusten duen kartela eta, aldi berean, hitzik gabeko gonbidapena, hura onartzera, probatzera, normalizatzera".


Kanal honetatik interesatuko zaizu: Gizartea
2024-03-31 | Diana Franco
Teknologia
Gorputzaren memoria

Mekanografia ikasi baduzu, gitarra jotzen, josten edo eskuz idazten, ulertzen duzu zure gorputzak zelan memorizatzen dituen zenbait jarduera. Gorputza eta adimena modu miresgarrian daude harremanduta, bat dira. Gizakiok sortu dugun teknologia eta honek gure gorputzarekin duen... [+]


Materialismo histerikoa
"Mario Lopez" eta "Gernika"

Krimen matxistak, mediatizatzen direnean, emakumeontzat lezio bilakatu ohi dira, eta bizirik badago, biktimarentzat. Nerea Barjola ikertzaileak Alcasserko kasuaren bidez azaldu zigun hori. Eta Nagore Laffageren hilketak ere lezio astun bilakatzeko arriskua izan zuen, lezioa... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Jokin Pantxeska Etxebarria. Gerrako ume, aitaita
"Hiru aldiz esan dute gorria naizela, komunista!"

Irisarriko herrigunera sartu orduko, hantxe, etxe baten atarian, ikurrina eta estelada. Jokin Etxebarriaren bizitokia duzu. Gerrako ume izandakoa, hamaika ibilera –eta hamaika baino gehiago ere bai–, han eta hemen egindakoa. 92 urtek nahi beste bizitzeko aukera... [+]


Eguneraketa berriak daude