ARGIA.eus

2020ko irailaren 22a
HUMANITATEAREN UNE GORENAK

40 urteak baino lehen

Aritz Galarraga @aritzgalarraga
2020ko irailaren 20a

Aurreko ikasturtean, berripaper serio horietako baten erronkari jarraiki, 35 urteetatik aurrera egin beharko ez genituzkeen hamar gauza zerrendatzen zituen zutabe bat idatzi nuen, zutabe arrakastatsu samarra, irakurleen erreakzio suminduak kontuan hartzen baditugu behintzat. Oraingo honetan, eta zutabe hauen bokazio publikoa berresteko asmoz, 40 urteak baino lehen egin beharko genituzkeen bost gauza garrantzitsu zerrendatu nahi ditut –lasai, ez da egongo, ze presio, 35 urteetatik aurrera egin beharko ez genukeen eta 40 urteak baino lehen egin beharko genukeen gauzarik–.

1.- Lagunak. Badakigu euskaldunon artean edozein adinetan dela zaila lagunak egitea, hotz egiten duela kuadrillaren babesetik kanpo, baina adin batetik aurrera gehiago zailtzen da kontua, are arriskua dago ero baten moduan begira zaitzaten lagun berriak egin nahi izate soilagatik. 2.- Literatur nobedadeak irakurri. Denborak estutzen duela jakitun, soilik klasikoak irakurtzea merezi du 40 urteetatik aurrera, gehienez ere gustuko libururen bat berrirakurtzea; baina bukatu da auskalo nolakoak atera daitezkeen nobedadeekin arriskatzea. 3.- Ariketa fisikoa. Esaten dute 40 urteak bete eta gero minik ez baduzu nonbait, hilda zaudela. Horri gehitzen badiogu edozein ariketa fisikok, denik eta ñimiñoenak, adin horretatik aurrera beti uzten duela arrastoa, konbinazioa izan daiteke, kasu honetan bai, mortala. 4.- Urteak kendu. Gaur eguneko 40ak garai bateko 20ak direla entzuten da, baina ez da bereziki kontsolagarria, batez ere norberaren 20 urteak gogoratzen badira. Nahiago, beraz, urterik ez kendu, eta gaur eguneko 40ak betiko 40ak badira. 5.- Zutabe friboloak idatzi. 40 urterekin jada pertsona errespetagarri bat zara jendearen begietara. Ez galdu estatus hori tontakeriekin. Zin degizuet, beraz, hau izango dela nire azken zutabe friboloa. Justu-justu, ordu gutxigatik, baina sartzen baita 40 urteak baino lehen egin daitezkeen gauzen artean.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Iritzia

Iritzia kanaletik interesatuko zaizu...

ASTEKARIA
2020ko irailaren 20a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude