Nuit Debout mugimenduak lehen asteburua bete du Frantziako plazak okupatuz

  • Ehunka lagunek hirugarren gauez Parisko République plaza okupatu dute igandetik astelehenera Nuit Debout ekimenaren baitan. Frantziako lan erreformaren kontrako manifestazioaren ondoren hasitako dinamikak Espainiako Estatuko M15a eta AEBetako Occupy mugimendua ekarri ditu gogora.

République plaza ari da izaten Nuit Debout mugimenduaren epizentroa, baina Frantziako Estatuko beste hirietara ere zabaldu da (argazkia: Mediapart).

2016ko apirilaren 04an - 11:54

Martxoaren 31n piztu zen protesta berria, Myriam El Khomri Enplegu ministroak bultzatu duen erreformaren kontra milaka herritar kalera atera zirenean. Langileak errazago kaleratu ahal izateko aukera eskainiko luke lege aldaketak.

Besteak beste negozio-zifrak okertuko balira edo enpresak berrantolatuko balira pertsonala murriztea ahalbidetuko luke. Gainera, kaleratutako langileak kalte-ordain txikiagoa jasoko luke eta enpresa bakoitzeko akordioek hitzarmen kolektiboek baino pisu handiagoa izango lukete.

Hego Euskal Herrian Espainiako Gobernuak ezarritako legediaren antza dute iragarri diren neurri berriek eta patronalaren zein alderdi kontserbadore frantziarren babesa dute.

Erreformaren kontra plazak okupatzeko mugimenduak lehen asteburua pasa du Parisen eta Frantziako Estatuko beste hainbat hiritan –Euskal Herritik gertu, Paben eta Bordelen ere antolatu dira, beheko mapan ikus daitekeenez–.

 

Plazak hartzeko deialdia

“Enpleguaren lege proiektuak hainbeste lagun mobilizatu baditu, izan da injustizia beti urrunago bultzatuz, jasan genezakeenaren dikea pitzatu duelako”, irakurtzen da Convergence des Luttes webgunean.

Atari horren bidez deitu zuten plazak hartzera. Antolatzaileen ustez “gure agintariak arnasarik gabe geratzen ari den sistema betikotzeko gotortu dira, geroz eta atzerakoiagoak diren erreformen prezioa ordainduz eta beti azken 30 urteetako neoliberalismoaren logikarekin bat eginez: botere guztia akziodunentzat eta patroientzat, aberastasun kolektiboak berenganatzen dituzten pribilegiatuentzat. Sistema hori inposatu zaigu gobernuz gobernu, demokrazia ukatzen duten forma ugariren bidez”.

Parisko agenda militantea biltzen duen Demosphere webgunean ikusten denez, egunero 18:00etan deitu dituzte Nuit Debout ekimenaren batzar orokorrak. Gainera, apirilaren 5ean eta 9an beste bi manifestazio deitu dituzte Parisen El Khomri ministroak bultzatutako lan erreformaren kontra.

Merci Patron! filmaren protagonismoa

ARGIAren 2.500. zenbakian Pello Zubiriak aipatu zuen Merci Patron! dokumentalak ere eman du zeresanik Nuit Debout mugimenduaren baitan. Fakir hedabidearen eskutik estreinatu den filmaren proiekzio publikoa egin zuten martxoaren 31 gauean République plazan.

Fabriken deslokalizazioa salatzen duen dokumental konprometituak zeresan handia eman du Frantziako Estatuan eta zenbait dagoeneko hasi dira esaten, goizegi zalantzarik gabe, hura zuzendu duen François Ruffin kazetaria izan daitekeela hexagonoko Pablo Iglesias berria.


Kanal honetatik interesatuko zaizu: Nuit Debout mugimendua
Asanblada eta kanpalekua. Politika, bestelako munduak sortzeko

Zergatik ez du Nuit Debout frantziarrak M15 espainiarraren irismenik izan? Elementu guztiak zeuden (eta daude) mahai gainean: alderdi sozialistaren beste eraso bat lan eskubideen aurka ("Loi travail"), egonezin sakona eta "zerbait gerta zedin" guraria giroan... [+]


Parisko Errepublika plaza gau eta egun okupatzeko deia egin du Nuit Debout mugimenduak

Ekainaren 28tik gutxienez uztailaren 10era arte, Parisko Errepublika plaza modu iraunkorrean okupatzeko dei egin du Frantziako Nuit Debout mugimentuak.


2016-06-09 | Estitxu Eizagirre
Nuit Debouteko gakoak azaldu ditu Miguel Seguik

Miguel Segui NPAko (Nouveau Parti Anticapitaliste) kidea da eta azken hilabeteetan Frantziako plazetan antolatu den Nuit Debout mugimenduan parte hartzen du. Ekainaren 8an hitzaldia eman du Gipuzkoa Zutikek gonbidatuta, Bulebarrean.


Sindikatuen zortzigarren greba eguna Frantziako Estatuan

Grebak, erregai biltegien blokatzeak, bide mozketak, zentral nuklearretako mobilizazioak… El Khomri legeari aurre egiten ari zaizkio zortzigarren egunez sindikatuak, CGT buru dutela, maiatzaren 26 honetan, ahaztu gabe Nuit Debout mugimenduak egunero antolatzen dituen... [+]


Eguneraketa berriak daude