Latinoamerika eta Jamaikako ardo gorri onenak

  • Vendetta ::Puro infierno

    Baga-Biga

    iraupena ::43´05´´

    prezioa ::11€

Vendetta Skalariak eta beste taldeetan ibilitako musikari trebatuek osatu zuten eta azken urteotan non-nahi ari dira emanaldi arrakastatsuak eskaintzen; inork ezin ditu gelditu. Bada ska eta rocka ondo nahastuta arrakasta lortutako zenbait talde, baina iruindarrek gehiago probatu nahi dute, eta bigarren lan honetan koordenadak aldatu dituzte. Kanta askoren oinarria ska, dantza eta tronpetak eta tronboiak piztutako patxanga geldiezin eta kutsakorra den arren –Bad Manners eta raggamuffia ere ezin ahaztu–, Latinoamerikara gero eta gehiago begiratzen diote (rantxerak, balada latinoa, Kubako malenkonia, Mano Negra…). Ez hori bakarrik, barruan daramaten alderdi punk eta rockeroa ere behin baino gehiagotan azaleratzen dira. Mobida tronpeteroak ez zaituela betetzen? Hitz egin aurretik, jarri arreta…
Pello Reparaz: "Baikortasun eta ostia txar fusioa da gurea"

Zer dauka ska musikak non-nahi hain entzuleria fidela eta konexio ona lortzeko?

Baikortasun mezua barruan dakarren estiloa da. Euskal Herrian eta Espainiako Estatuan horrenbeste jotzeak bistan uzten du jendeak mezu horren egarria duela. Irribarre, baikortasun eta ostia txar fusioa da gurea, eta hori transmititzeko ska, rock, punk, latin, reggae eta bihotzak eskatzen digun estilo oro erabiliko dugu.

Musika latinoa eta jamaikarra dira iturri nagusienak?

Serioago jarri nahi badugu eragin punkienak azaleratzen ditugu baina dantzarako Latinoamerikara jotzen dugu. Gorputza mugitzean irriak, besarkadak, ukabilak eta ideiak mugitzen dira. Ez dugu Vendetta mugimendurik gabe ulertzen.

Ska-tik at, badira hit bihur daitezkeen A muerte, Begitara begira pop-reggaea eta Manak idatzi nahi izango lukeen Buonasera, adibidez.

Begitara Begira eta Buonasera bezalako abestiak gure ohiko ardatzetik ateratzen diren abestiak dira, eta benetan berezi ari dira bilakatzen guretzat eta zaleentzat.

“Ez dakart abestirik, ezta poema handirik, bakarrik nire bihotza taupada gogorrean”. Sentimenak dira funtsezkoena?

Planteatu diot neure buruari jendeak zer entzun nahi duen. Ikertu ere egin dut. Baina abesti bat idazterakoan, ezin izango dut inoiz jendeak entzun nahi duena oinarritzat hartu. Argi dakartzagu mezuak, sentimenak eta ideiak.

La Diabla, La Familia, A muerte, zuen estetika bera... Mexiko oso presente dago.

Doinuek, oihuek eta iraultzek batzen gaituzte. Ezin dugu tendentzia hori ukatu eta hemen duzue Puro Infierno. Hemendik hara, iraultza multikultural eta internazionalista.

Pasos de acero. Borrokatu beharra?

Ostia txarrez idatzi nuen kanta hori eta beste garai batzuetan egin nuen arren, gaur egun idatzia ere izan zitekeen –Errekaldeko genozidio kulturala kasu–. Suaren aurrean, sua. Aupa Kukutza!


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude