«90.000 haurrek nahi dute valentzieraz irakurri eta idatzi, baina eskaintzarik ez dago»
Escola Valenciana, Hizkuntzaren aldeko Elkarteen Federazioa da. 1984-85 urteetatik ari zen hainbat gizarte mugimendu valentzieraren aldeko eginahalean, eta batik bat, hezkuntzan. Eskualde mailako elkarteak dira eta 1990ean federazioan batu ziren. Irakasleak, gurasoak, mota guztietako kultur elkarteak (musika, antzerkia, animazioa...) eta udalak eta mankomunitateak batzen dira.
Escola Valenciana valentzieraren aldeko mugimendurik indartsuena da gaur egun Valentziar Herrialdean.
Zein da Escola Valencianaren helburua?
Gure helburua valentziera defendatzea da. Hasierako asmo nagusia hizkuntza eskolan normalizatzea zen. Duela urte batzuez geroztik erabilera sozialak arduratzen gaitu bereziki. Eskolan bai, baina gero kalean behar dugu valentziera: zineman, musikan, merkataritzan... Udaberri oro eskualde mailako 17 jaialdi antolatzen ditugu eta 200.000 pertsona biltzen dira. Helburua horixe da, valentziera kalera ateratzea jolas giroan eta alai, eta era berean, aldarrikatzaile.
Nolako ekintzak antolatzen dituzue valentziera sustatzeko?
Esparru anitzetan aritzen gara. Bikote linguistikoak dauzkagu, alegia, valentziera ikasi nahi dutenei lagunduko dien boluntario taldea. Bestalde, zinema eskolara hurbiltzen saiatzen gara eta rock musikako jaialdia antolatzen dugu urtero. Kanpainak ere egiten ditugu, esate baterako, haurrak valentzierako eskolan matrikulatzekoak.
Gure nahia da jendeari helaraztea haurrek hizkuntza menderatzea baikorra dela. Dena den, harago joan nahi dugu. Erakutsi gura dugu baikorra dela nork bere hizkuntza maitatzea eta norberak sinestea valentzieraz bizi daitekeela. Zeren ez dugu ahaztu behar valentziera legezkoa dela, hots, legeak valentziera erabiltzeko eskubidea ematen didala.
Valentziar Herrialdeko eskoletan nola egituratzen da valentzieraren irakaskuntza?
Panorama konplexua da. Kontuan hartu behar da, batetik, legez bereizita daudela gaztelania hiztunen eremuak eta valentziera hiztunenak. Bestetik, ikastetxeen autonomia eskubidea dago tartean. Eta azkenik, norbanakoaren eskubidea dago, hau da, valentziera haurrei irakatsi nahi ez dien gurasoen eskubidea.
Nola islatzen da hori hizkuntz ereduetan?
Lau dira. Lehenengoak irakaskuntza valentzieraz eskaintzen du, hizkuntza horretan irakurri eta idazteko. Bigarrena murgiltze eredua da, hau da, valentziera hiztuneko eremuetan dauden gaztelania hiztunentzat. Haurrak gaztelaniaz hasten dira eta valentzierara pasatzen dira. Hirugarrenaren bidez valentziera poliki-poliki jasotzen dute haurrek. Horrela behar lukeela dio ereduak, gero ez da hala gertatzen. Laugarren ereduan dena gaztelaniaz egiten da, valentziera ikasgaia ezik. Egitura horren helburua zen haurrek bi hizkuntzetan gaitasuna lortzea.
Esan duzu gurasoek valentziera ez ikasteko eskubidea aldarrikatzen dutela.
Ez dute nahi seme-alabek valentziera ikasterik. Ados, baina ume horiek ez dira elebidunak izango. Eta bestalde, eskubidea urratzen dietela diote. Katalunian zenbat gurasok eskatu dute eskubide hori betetzeko? 28k? Bada Valentziar Herrialdean 90.000k nahi dute valentzieraz irakurtzea eta idaztea, baina eskaintzarik ez dagoenez, lehen aipatu dizudan hirugarren eredu horretan sartzen dituzte.
Eta eredu horretan ez dute ikasten valentziera.
Ez. Hori ez dugu guk esaten, hezkuntza kalitatea ebaluatzeaz arduratzen den erakunde valentziarrak dio hori. Orain hiru hizkuntzetan gaitasuna lortzearen kontuarekin gabiltza, valentzieraz, gaztelaniaz eta ingelesez. Gu ez gaude horren kontra, hiru eledunak badira primeran eta eleanitzak badira hobe, baina lehendabizi izan daitezela elebidun.
Zein itxura du etorkizunak?
Boteila erdi beteta edo erdi hutsik ikus daiteke, baina 25 urte eta gero 100 ikasletik 25i baino ez bazaie irakasten irakurtzen eta idazten valentzieraz, ezin dugu 75 urtez itxaron. Zerbait egin beharko da, eskolan eta eskolatik kanpo.