EUSKARA 2015
Hizkuntza Kontseilua arduratuko da Ipar Euskal Herriko "Euskara 2015 Plan Estrategikoa" gauzatzeaz. Hizkuntza Politika definitzeko estrategia Obragintza Publikoaren agindu bat izan da, eta Jean Michel Devret Baionako suprefetaren eskutik etorri da. Obragintza Publikoa, Estatua, erregioa, departamendua, udal eta herri arteko sindikatuen ordezkariez osatua dago. Plan honen bidez, heldu diren hamar urteetarako hizkuntza politika zehaztu eta egituratuko da Ipar Euskal Herriarentzat
124 EUSKAL PRESOK ASKE BEHARKO LUKE
ESPAINIAKO espetxeetan dauden 124 euskal presok aske beharko luke jada, normalean, estatuko beste gainerako presoei ezartzen zaizkien arauak betez gero. Preso hauek guztiek zigorraren hiru laurdenak beteta dute jada espetxean, baina Espetxe Erakundeetatik ez da horrelakorik onartzen eta preso mantentzen dituzte .Egoera hau salatzeko, Etxerat erakundea «Noizko...?» izeneko ekimena eramaten ari da aurrera eta hilero herriren batean euskal presoen senideen elkarretaratzeak egiten ari da. Hiru egin dira jadanik, lehena Zornotzan, ondoren Gasteizen, eta azkena Arrasaten, iragan igandean.
RAMON JAUREGI ETA UDAL HAUTESKUNDEAK
DATORREN maiatzeko udal eta foru hauteskundeak hurbildu ahala, proposamen eta ideia desberdinak ari dira plazaratzen. Ramon Jauregi PSOEko buruzagiak PP eta PSOEk herri askotan zerrendak osatzeko arazoak izanez gero, «alderdi demokratiko guztiak» batera aurkeztea edo hauteskunderik ez egitea proposatu du.
GARZON ETA EUROPA
BALTASAR Garzon epaile espainiarrak ukatu egin du sortu berri den Nazioarteko Zigor Arloko Epaitegira edo Estrasburgoko Giza Eskubideen Auzitegira joango denik. Entzutegi Nazionala utz zezakeen zurrumurrua aspaldi dabil dantzan eta joan den astean «El Periódico de Alava»k argitara eman zuen. Garzonen esanetan, «terrorismoa babesten dutenek» egoera nahastu eta ETAren aurkako lana oztopatzeko zabaldu dute zurrumurru hori.
ESPAINIAR KONSTITUZIOZALEEN BILGUNE BERRIA
ASKATASUNERAKO Fundazioa sortu berri dute Ermuko Foroa eta Aski da! plataformaren inguruan aritu diren zenbait pertsonek. Edurne Uriarte EHUko irakaslea izango da fundazioaren lehendakaria. Sorrera ekitaldia ekainaren 29an egin zen eta PP eta Nicolas Redondo Terreros PSE-EEko idazkari nagusi ohiaren inguruko kide ugari bildu zen ekitaldian. Ez da oharkabean pasatu PSOE eta egungo PSE-EEko zuzendaritzako kiderik ez zela izan espainiar konstituziozaleen bilgune berrian.
DEPARTAMENDUAREN ESKE
ANDRE Darraidou auzapeza eta Hautetsien Elkarteko lehendakariak euskal departamenduaren eskaera berritu dio Jean Michel Devret suprefetari. Joan den larunbatean, 60 hautetsi inguru bildu zen Baionako suprefeturaren aitzinean. Suprefetak departamendua sortzeko traba nagusia bortizkeria dela dio, Darraidouk, aldiz, Euskal Departamendua aldarrikatzen ez dela sekula bortizkeriarik erabili adierazi zion.
IBARRETXE ETA SAHARA
JUAN Jose Ibarretxe lehendakariak Mendebaldeko Saharara egin berri duen bidaia politikoki ez zuzena izan da zenbait gunetan. Espainiako Kanpo Arazoetarako Ministerioak ez du gustuko autonomietatik halako bidaiak bere baimen eta oniritzirik gabe egin daitezen. Marokok ere ez du atsegin Europatik administrazio aginte maila handia duten zonalde edo herrialdeek Fronte Polisariok gidatzen duen administrazioarekin halako harremanik izatea. Aazkenik, euskal enpresari asko beldur da halako bidaiek euskal enpresek Marokon duten interesei kalte egitea eta horregatik kritikatu zuen Confebask-ek bidaia hau.
DESOBEDIENTZIAREN BIDETIK
DESOBEDIENTZIA zibilaren egunak Ezpeletan egingo dira urriaren 13 eta 14an, Demoek, ABK-k, Zuzen Ekintza Taldea eta Desobedientzialariak deituta. Desobedientzia zibilaren bidetik, Euskal Herriak autodeterminazioa gauzatu: posible da lelopean egingo da.