«Oso zaila da telebista kate guztiak ados jartzea kodea gauzatzeko»


1993ko maiatzaren 16an
Koro Lasarteri elkarrizketa telebistari buruz
«Oso zaila da telebista kate guztiak ados jartzea kodea gauzatzeko»
Koro Lasarte, ETBko musika eta haurrentzako barne ekoizpenen arduraduna:
ARGIA. Zein balorazio egiten duzu ETBk sinatu berria duen kode etikoari buruz?
KORO LASARTE. Izugarria iruditzen zait. Hemen bertako saioak krudelegiak izan ez daitezen saiatzen garen bitartean, kanpoan erosten diren produktuekiko, marrazki bizidunekiko, adibidez, ez da horrelako begirunerik gordetzen. Oso biolentoak dira gehienak.
Baina zer egin behar da horrekin? Aukeretako bat saio horiek ez eskaintzea litzateke, edota saio hauen egileei esan behingoz horrelakoak ez egiteko. Beste zerbaiti jarraiki egin beharko lituzkete.
A. Kodea sinatu egin da, baina ez da kode hori indarrean jartzeko bitartekaririk asmatu.
K.L. Testua ikusita, argi dago hau proiektu bat besterik ez dela, baina jakin ezazu nor den proiektu hau martxan jarriko duena! Nork erabakiko du saio bat eman daitekeen ala ez?
Ezin da ahaztu telebista asko garela, eta oso pentsamendu desberdinekin gainera elkarren artean. Zer arraio esan behar dut nik Tele 5eko aurkezle batek haurrei hitz egiteko erabiltzen duen hizkera guztiz desegokia iruditzen bazait?
A. Posible ikusten al duzu kode hori zerbaitetan gauzatzea?
K.L. Proiektua ongi dago, lehen esan bezala, baina ez dakidana da ea telebista kateen aldetik batzorderen bat edo eratuko ote den. Dena dela, oso zaila ikusten dut, batez ere telebista bakoitzak helburu batzuk dituelako.
A. Saioez ari gara, baina telebistan iragarkiek ere ildo konkretu bat daramate. Kode horrekin bat ez datorrena ziurrenik.
K.L. Hori ere aztertu beharreko arloa da. «Galakt hika» saioa egin behar genuenean, adibidez, oso zaila egin zitzaigun bideo-kontsola egokiak aurkitzea. 200 bat programa ikusi genituen indarkeririk ez zutenak aukeratzearren. 26 besterik ez genituen aurkitu, eta SEGA etxeak publizitatea egiten zuenez, azkenean ia behartu egin gintuen horrelako programak telebistan erakustera.
A. Dirurik ematen al du egun indarkeria edota sexua ez duen programak?
K.L. Batere ez. Gero hori eskaeraren araberakoa dela diote, baina egungo eskaera eskaintzaren arabera hedatu da. Egileek beste zerbait asmatuko balute, haurrek onartu egingo lukete.
A. «Dragoi Bola» marrazkiak aipatu dituzu. Kode berriaren arabera, kendu egin beharko litzateke. Hori posible al da?
K.L. Oso zaila da. Arrazoi sinple batengatik: kanpoko ekoizpenerako erosketak erabakitzean autonomia guztietako kateak bilduko bagina batzar antzeko batean, eta guztion artean erabakiko bagenu programaziotik kentzea, oso ongi. Baina ez dut uste hori hain garbi dagoenik.
Amagoia Iban
24,25

GaiezKomunikabidTelebistaETBBesteak
PertsonaiazLASARTE2

Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude