Gauerdi inguruan hasi du erasoa Israelgo Armadak Jenin, Tulkam eta Tubas hirietan. Horretarako droneak eta helikopeto militarrak erabili ditu, eta ibilgailu kopuru handia sartu du eremu horietan. Palestinarren kontra tiro egin du eta gutxienez bederatzi lagun hil ditu, Palestinako Osasun Ministerioaren arabera.

Jeningo errefuxiatuen eremuan sartu dira Israelgo soldaduak, baita Nur Shamsen eta Tulkarmen ere. Ospitaleak inguratuta dituzte eta zerbitzu medikuei bertara joatea eragozten ari dira. Middle Eas Eye hedabideari bertako iturriek azaldu diotenez, ibilgailu militarren kopuruagatik –hondeamakinak barne– antzeman daiteke epe luzerako operazioa dela.

"Operazio antiterrorista berezia" eufemismoa erabili du Israelgo Gobernuak erasoa deskribatzeko; baina 2002ko Bigarren Intifadatik ez dela horrelakorik ikusi ziurtatu dute lekukoek.

Hiriak erabat geldituta daude eta egoera "katastrofikoa" dela ziurtatu diote hedabide berari lekukoek, soldaduak etxeak ari baitira asaltatzen.

Canal 12k informatu duenez, lau batailioi ari dira parte hartzen erasoan eta Yisrael Katz israeldar Defentsa ministroak adierazi du "azpiegitura islamiko-irandarrak kolpatzea" dutela helburu. Hala, mandatariak Zisjoardaniako herritarrei eskatu die "behin behinean ebakuatzeko" beraien etxeak.

Palestinar talde armatuak, bestalde, lehergailuekin eta eskura dutenarekin ari dira erantzuten. Israeldarren artean biktimarik izan ote den ez dute berririk eman.