Auñamendi entziklopediak dioenez, 1928an sortu zen Arrangoitzen eta farmazialaria izan da ofizioz erretreta arte. Gaztetan pilotari famatua izan zen, 20 urteko kirolari bizitza luze bezain arrakastatsua izan zuen eta mundutxo horretako istorio ederrak bazituen, 2006an ARGIAn Miel Anjel Elustondori kontatu zizkionak bezalakoak.

Euskal kultur munduari eta batik bat kantu eta musikari atxiki zitzaion oso gazterik eta 1950ko hamarkadatik aurrera ekitaldiak sustatzeaz gain garai hartan tresna kasik ezezaguna zen magnetofoian grabatzen zituen; altxor aberatsa utzia du honetan ere.

Mugimendu abertzale berriaren erreferentzietako bat izan da Haran Ipar Euskal Herrian. 1963an Itsasuko harri famatuaren aurrean Enbata (hasieran Embata zen) sortu zutenen artean zen Haran. Hainbat kanpaina eta hauteskundetan parte hartu ostean, EAJren gizon erreferentziala izan da Iparraldean, Ipar Buru Batzarreko lehendakari ere izanik. Alderdiko karguak utzirik, 1998an Abertzaleen Batasunarentzako eskatu zuen botoa. Bere pentsamendu politikoa ARGIAko zenbait elkarrizketatan azaldua du:

- B. Artolaren elkarrizketa “Borroka armatua egotea guztion erantzunkizuna da”

- Mahai-ingurua LARRUNen (1999) “Mixel Labéguerieren aroa. Iparraldeko gizartea 60-70 urteetan”

- Miel Anjel Elustondoren elkarrizketa (2006) “Ximun Haran: «Marshall plana behar dugu Iparraldean»“