Urruntze agindua ezarri diote Villabonako eraso homofoboaren harira epaitutako ustezko erasotzaileetako bati. Poliziak identifikatutako erasotzaileetatik bik deklaratu dute asteartean Tolosako epaitegian, baita erasoa jaso duten bi pertsonek, haietako baten izebak eta lekuko batek ere bai. 

Epaileak aurreratu duenez, kasua lesio delitu gisa epaitzen jarraituko du. Hurrengo saioa ekainaren 21ean izango da, eta bitartean auzi-medikuak bikoteak dituen kalteak aztertuko ditu. 

Eraso homofoboa

Maiatzaren 14ko goizaldean, Kolonbiako bikote batek salatu zuen Villabonan (Gipuzkoa) gazte talde batek jipoitu egin zituela. Adierazi zuten erasoaren aurretik tabernan "marikoiak, atzerritarrak, hau ez da zuen lekua; alde hemendik!", gisako oihuak egin zizkietela hamabost gazte inguruk. Azaldu dutenez, tabernatik ateratzean haiekin zegoen izebari ere ukabilkada bat eman zioten, eta bikotea Polizia gerturatu arte jipoitu zuten.