Umeen kontrako abusuak salatzen segituko du Getxoko mugimendu feministak

  • Astelehena, azaroaren 19a, Adin Txikienganako Sexu-abusuen eta Tratu Txarren Prebentziorako Nazioarteko Eguna. Getxoko mugimendu feministak babestu egin ditu umeen sexu-abusuak salatzeagatik ikerketapean dauden militanteak.

Hiruka .eus
2018ko azaroaren 20a
Umeen kontrako sexu-indarkeria zigor barik gera ez dadin eskatu zuten 800 pertsonak Algortan, joan den ekainean (Argazkia: Hiruka.eus)

Datorren urteko martxoaren 8an beste emakume-greba bat egiteko lanak hasita dauzka Getxoko mugimendu feministak. Aurreko ikasturteak utzitako irakaspenetatik eta ondorioetatik landuko dute, eta datorren aste-akabuan abiatuko dituzte hainbat ildo.

Hiru pertsona ikerketapean

Ildoetako bat da epaiketa-bidean egon daitezkeen hiru pertsonaren kasua azaltzea. Hiru pertsona horiek hurbilekoak direla eta ikerketapean daudela jakinarazi dute Haurren Kontrako Indarkeriarik Ez! plataformak, Algortako Bilgune Feministak eta Haziak Algortako Emakume Gazte Feministen Taldeak. Ez dakite euren kontrako auzi bat zabalduko den ala ez. Zabaldu dutenez, hirurek lan publikoa egin dute pederastia eta umeenganako sexu-abusuak salatu eta mahai gainean ipintzeko. Lan horren adibide bat da joan den ekainaren 24an Algortan egin zen manifestazio jendetsua, "Haurren kontrako sexu-indarkeriaren aurrean zigorgabetasunik ez!" goiburu pean. Hiru eragileek azaldu dutenez, Algortan aita bat epaitu eta absolbitu zuten horrelako afera batean. Elkarteek landu zuten gaia, umea eta sendia identifikagarria egin zitekeen inolako informaziorik eman barik. Gogorra egin zitzaien kasua ezagutzea, "gureetako bat zela jakitea sinestezina zelako. Gure ezagun bat edo horrelako ezkerreko pertsona mitiko, iraultzaile eta borrokalaria edo nire lehengusu bat, edo zure anaia, edo kuadrillako guaiena... ezagunak direnean, nola egiten zaio aurre?". Euren berbetan, "isilik geratzea oso garesti ordainduko dugu gizarte modura. Ausardia ez da beldurrik ez sentitzea, beldur izan arren erantzutea baizik".

Euren ustean, "Manada"-koak edo ezezagunak salatzea "oso erraza" da, baina arazoa paraje denean ez omen da samur egiten: "Batzuentzat errazena da esatea: hori etxean konpontzen da, hori familien kontua da, gu ez gara sartuko, ez naiz posizionatuko; eta guk pentsatzen genuen hori ez dela horrela konpontzen den kontu bat. Posizionatzea eskatzen du, borroka egitea, egoera horretan zoritxarrez ume piloa dagoelako. Zenbat jende dago, oraingoa lantzen hasi garenean, gogoratu dena txikitan jasandako erasoakaz, orain ausartu dena berbak ipintzen horri!", nabarmendu dute.

Onartzen dute "betidanik" egon den gaia dela, baina eragile horiei "lehertu egin zitzaien eskuartean". Azaldu dutenez, "erabaki genuen ezin genuela beste alde batera begiratu, ikusita gainera ume bat zegoela hor". Ume horretaz gainera, kontziente dira arazoa globala dela eta Euskal Herrian  milaka neska-mutili eragiten diola, 13 urte azpikoen %20ri, Europako Kontseiluaren ikerketen arabera. Hala, arazo hori "beste borroka-zelai bat" dela ulertu eta bertara sartu ziren plataforma, Haziak, Bilgune eta beste hogei bat elkarte feminista. Denek hartu zuten jarrera argi bat: "Esan genuen nori sinisten diogun: umeei, kasu horretan ere". Horrek hausturak sortu zituen eragile horietako hainbat militanteren eta euren betiko lagunen artean. Euren ustean, "errazagoa da esatea: ez, gezurra da, esajeratzen dabiltza... Baina sinesten baduzu, zer edo zer egin behar duzu; horrelako kontu baten aurrean posizionatzeak berak eskatzen dizu lanketa bat egitea", kaleetan zein auzi-prozesuan.

Bigarren arloan, ikusi dute "justizia matxista zelango ankerra den, zelango injustua den". Justizia eredu horrek ez die balio: "Ez dago formazio feministarik epaitegietan". Zerrenda luzea egin dute "epaileek esaten dituzten astakeriakaz", "Manada"-ko auzia, Juana Rivasena eta beste hamaika aipatuta. Hori dela eta, azaroaren 25ean justizia kristau eta patriarkala salatuko dute. Data hori hur dagoela, Bilgune Feministak gogorarazi du indarkeria ez dela soilik fisikoa edo psikikoa: "Politikariak kanpainan ipiniko dira berriro, eta eskatu beharko diegu, pasatu dugun urte beltzagaz, erakundeak morez bete ditzatela; ezin ditugu aukerak galdu politika feministak lantzeko eta aldarrikatzeko, politikarien agendetan goi-goian egon daitezen: aurrekontuan, hirigintzan... Gaur egun dena dago lotuta emakumeen kontrako indarkeriagaz: puntu beltzak, non ipintzen dituzten autobusak, non plazak, zer zaintza-eredua gura dugun, lanaren behin-behinekotasuna... Getxon, etxeko langileen mundu ikusiezina mahai gainera ekarri behar dugu".

Datuak

4tik 1. Lau neskatilatik batek sexu-abusuak jasaten ditu 13 urte bete aurretik, eta egoera bera bizi dute zazpi mutikotik batek, Haurren Kontrako Indarkeriarik Ez plataformaren arabera.

6 urte. Sei urte bitarteko umeen testigantzak ezin dira kontuan hartu legeen arabera,  Haziak taldeak gogorarazi duenez: "Ez omen da objektiboa ezta erreala ere; legea ez dago prest eta gizartea eta epailea ere ez".

Getxoko mugimendu feministaren egitaraua

Azaroak 23, barikua

19:00 "Deskontrolatua antzezlana", Itzubaltzetako Ibar nagusien etxean, Itzubaltzetako Emakumeen Asanbladak antolatuta.

Azaroak 24, zapatua

13:00 Umeen kontrako indarkeriari aurre egiten dutenei ez isiltzeko agerraldia, Algortako Telletxe plazan.

Azaroak 25, domeka

13:00 Justizia matxista salatzeko elkarretaratzea, San Nikolas plazan.

Martxoaren 8ko grebaren arrakasta errepikatu gura dute datorren urtean

Euskal Herriko Mugimendu Feministak joan den irailaren 22an erabaki zuen datorren urtean ere emakumeen* greba egitea, martxoaren 8an. Horren prestaketa hasteko, bilera irekia antolatu zuten Haziak eta Bilgune Feminista taldeek joan den urriaren 26a, Algortan. Azaldu dutenez, martxoaren 8an kaleak betetzeko asmoa daukate datorren urtean ere. Hori dela eta aurtengo ereduari jarraituko diote, antolakuntza horizontala erabiltzen eta lana sareetan egiten. "Iaz Bilgune Feministakook batzar hori planteatu genuenean, ikusten genuen bazegoela indarra, eta gaur egun ere badago, gazteen, pentsionisten eta alargunen aldetik, mugimendu feministagaz batera. Hemen, Algortan eta Itzubaltzetan ere bagara eragile feminista asko, bakoitza gure arloan gabiltzana".

Sindikalismotik ere ibili ziren greba antolatzen, "ahal genuen moduan", eta lehenengo bileran aretoa gainezka ikusi zutenean, argi izan zuten «badagoela indarra eta borrokarako gogoa". Orduan azaldu zuten 24 orduko greba feministarako deita eginda zegoela martxoaren 8rako, eta lantzen eta indarrak biltzen hasi ziren. "Apustu bat egin genuen: egingo dugu. Horretarako, gazteei, pentsionistei, Algortako mugimenduari... deitu genien, Itzubaltzetak beste dinamika bat daroalako". Algortan 25 bat emakume elkartu ziren, eta diagnostikoa konpartitu zuten.

"Batzuk gazteagoak ziren, beste batzuk nagusiagoak, baina zer batzen gaitu? Emakumeak* garela. Berdin zaigu zer adin edo zer kolore edo zer klase sozial izan, emakume izate hutsagatik sistema matxistaren indarkeria pairatzen dugu egunero. Pentsionistak, alargunak, etxeko langileak, gazteak, ikasleak, langileak... Denok jasaten dugu indarkeria-motaren bat". Euren ustean, "hemen oso naturalizatuta dago gu garela ahulak, eta horrela sozializatu gara. Horrelakoak konpartitu genituen, batzen gaituztelako. Gero bakoitzak gure ideologiak edo gure esparruak izan arren badago oinarri hori, batzen gaituena". Datorren grebako antolakuntzan parte hartu gura duenak badu datozen ekimenetara hurreratzea.

Albiste hau hiruka.eus-ek argitaratu du eta CC-by-sa lizentziari esker ekarri dugu ARGIAra.
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Indarkeria matxista  |  Getxo  |  Haurren eskubideak

Indarkeria matxista kanaletik interesatuko zaizu...
2018-12-17 | ARGIA
Indarkeria matxistarik gabeko jendartea irudikatzen jarraitu nahi du Asun Casasola ipuin lehiaketak

2008ko Sanferminetan José Diego Yllanes iruindarrak Nagore Laffage hil zuen eta ordutik jendartea eraldatzeko borrokan dihardu Laffageren ama Asun Casasolak. Aurten ere, Casasolaren omenezko ipuin lehiaketa antolatu dute; “Nik sinesten zaitut” izango da edizio honetako gaia.


2018-12-11 | ARGIA
Iruņean salatutako azken eraso matxista gaitzesteko mobilizazioak deitu dituzte

Abenduaren 8ko goizaldean, emakume gazte batek Iruñeko Errotxapea auzoan eraso matxista jasan zuela salatu du. Iruñeko Udalak astelehen goizean egin du erasoa gaitzesteko elkarretaratzea, eta mugimendu feministak astearte arratsalderako deitu du mobilizazioa.


Emakume bat drogatu, bortxatu eta lapurtzeagatik bost urteko kartzela zigorra ezarri dute Madrilen

Madrilgo Auzitegi Probintzialak sexu-abusuak izan zirela ebatzi du, drogatu ondoren biolentzia ez zela beharrezkoa izan adieraziz.


2018-12-05 | ARGIA
Sanferminetako talde bortxatzaileei ezarritako zigorra berretsi du Nafarroako Auzitegi Nagusiak

Sexu abusu delitu jarraituagatik zigortu dituzte bost bortxatzaileak. Bost epaileetatik bik abusua ez baina erasoa izan zela uste dute.


2018-11-27 | ARGIA
Emakumeen aurkako indarkeriaren kontrako egunean jazotako hiru eraso matxista salatu dituzte Bilbon

Azaroaren 25ean, Emakumeen aurkako indarkeriaren kontrako egunean bertan gertatu dira hiru erasoak.


2018-11-26 | Iņigo Igartua
Milaka lagunek babestu dituzte indarkeria matxistaren aurkako mobilizazioak Euskal Herrian

Emakumeen kontrako indarkeria salatzeko protesta eta elkarretaratzeak antolatu dituzte mugimendu feministek Euskal Herriko hiriburu zein udalerrietan.


2018-11-25 | Revue Ballast
Mona Chollet
"Ezinezkoa da noizbait sorginaren rolean ez aurkitzea"

Mona Chollet (Geneva, Suitza, 1973) Le Monde Diplomatique egunkariko kazetaria eta saiakera idazlea da. Frantzian salgai dago irailaz geroztik bere azken lana: Sorcières – La Puissance invaincue des femmes (Sorginak – Emakumeen garaitu gabeko indarra). Europako sorgin ehizaren garaiko herentzia patriarkala gaur egunera ekarri du. Galdera bat bota du: zergatik dira zalantzan jarriak emakume independenteak, adinekoak eta umerik ez dutenak?
Revue Ballast hedabideak argitaratu... [+]


2018-11-23 | Amaia Lekunberri
Beren borondatearen aurka antzutu zituztela salatu dute Kanadako 60 emakume indigenak

1973az geroztik legez kanpokotzat jo izan da jendarteko kolektibo jakin batzuk antzutzera behartzea. Azaleratzen joan diren testigantzen arabera, ordea, praktikak bere horretan dirau.


"La Manada"-ren epaileek 10 hilabeteko kartzelarekin zigortu dute bikotekidea hiltzen saiatu zen gizona

Erasotzailearen defentsak eskatzen zuena baina zigor txikiagoa ezarri diote. Epaiak ebatzi du “libreki eta borondatez” erabaki zuela emaztea ez hiltzea.


2018-11-22 | Iņigo Igartua
Genero indarkeria jasan duten EAEko 4.565 emakumek Ertzaintzaren babesa jasotzen dute

Iaz baino 80 emakumek gehiagok jasotzen dute babesa. Nabarmentzekoak dira "Bortxa" telefonoa erabiltzen duten 732 emakumeak –Ertzaintzarekin lotura zuzena dute– eta bizkartzaina duten 66ak.

 


Azkenak
EGILEA
Eguneraketa berriak daude