Salaketaren arabera, haurrak bi urte zeramatzan ikertzen ari diren gizonaren sexu erasoak jasaten. Ama lanera joaten zenean, gizona adin txikikoa zaintzen gelditzen zen etxean, eta, ustez, une horiek baliatzen zituen sexu erasoak egiteko. Haurraren salaketaren arabera, azken erasoa 2022ko Gabon gauean gertatu zen, baina haurrak urtarrilaren 8an eman zion gertatutakoaren berri amari; gizonak mehatxatu egin zuela dio salaketak, amari zerbait kontatzen bazion kontsola puskatuko ziola esanez.

Akusazio partikularrak ustezko erasotzailea kartzela sartzeko eskatu zuen, baina aske jarraitzen du, behin-behinean; pasaportea kendu diote, ezin du Espainiako Estatutik atera eta hamabost egunean behin epaitegira joan behar da, urtarrilaren 10eko autoak dioenez. Auto horretan bertan, kasuaren epaile instruktoreak agindu zuen deklarazioa hartzeko gizonari zein haurrari. Era berean, epaitegiko lantalde psikosozialari eskatu zion sinesgarritasunari eta eragin psikologikoari buruzko txostena egiteko. Ordea, haurraren abokatuak hala eskatu bazuen ere, instruktoreak ez zuen azterketa forentserik agindu.

Ordutik, abokatuak gutxienez beste lau aldiz eskatu du azterketa forentse hori, eta, azkenean, urtarrilaren 30ean onartu egin zuen instruktoreak, baita azterketa agindu ere. Ordea, oraindik ez diote egin. Akusazioak dio “kezkagarria eta larria” dela gertatzen ari dena, eta garrantzitsua dela azterketa forentsea egitea, “egitateak berresteko” elementu “objektiboa” izango litzatekeelako. Halaber, “denbora igarotzen uzten” ari direla salatu du, eta horrek “fisurak edo gertaeraren edozein aztarna sendatzeko aukera” dakarrela.