ARGIA.eus

2021eko urriaren 16a

Sexu abusuen biktima diren adin txikikoei arreta osoa emateko proiektu bat abiatuko du Jaurlaritzak

  • Islandian sortutako Barnahus proiektu pilotua EAEra ekarri dute. Beatriz Artolazabalek argitu du asmoa dela laguntza judiziala zein soziosanitarioa eskaintzea.

Leire Artola Arin @aleirea
2021eko urriaren 13a
Beatriz Artolazabalek jakinarazi du Islandiako Barnahus eredua EAEn abiatuko dutela.

Sexu abusuak jasan dituzten adin txikikoei arreta osoa emateko Barnahus proiektu pilotua martxan jarriko du Eusko Jaurlaritzak. Hala zehaztu du Beatriz Artolazabal Berdintasun, Justizia eta Gizarte Politiketako sailburuak, eta jakinarazi du programa horren helburua dela biktimei laguntza osoa ematea; alegia, judiziala eta soziosanitarioa. Proiektua Islandian sortu da, eta abusuak pairatu dituzten haurrak artatzeko errespetuzkoak zaizkien "haurren etxebizitzak" sortzean oinarritzen da. Save The Children Gobernuz Kanpoko Erakundearen bidez ekarri dute EAEra.

Asteazken goizean egin dute Haur eta Nerabeen Arretarako Batzorde Iraunkor Sektorialaren bilera eta bertan azaldu dute Barnahus proiektuaren lehen urratsa “diagnostiko sakona” egitea izan dela. Lantalde tekniko bat osatu dute eredua EAEko “ezaugarrietara eta berezitasunetara egokitzeko”, eta azaroaren erdialdean aurkeztuko dute bildutako informazioaren eta gomendioen txostena. Zenbait arlotako ordezkariak elkartu dira taldean: justiziakoak, talde psikosozialetakoak, osasunekoak, hezkuntzakoak, segurtasunekoak, Foru Aldundietako Haurren Zuzendaritzetakoak eta Arartekoarenak.

Haurrak eta nerabeak babesteko legea

Halaber, bileran beste bi gai jorratu dituzte: Haurrak eta Nerabeak Babesteko Euskal Lege berria eta kolektibo horientzako indarkeriaren aurkako euskal estrategia. Estrategia horrek fokua jarriko du indarkeriari aurre hartzean eta esku-hartze azkarrean. Artolazabalek azpimarratu du hiru proiektuak “azken faseari aurre egitear” daudela.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Adingabekoen eskubideak  |  Eusko Jaurlaritza

Adingabekoen eskubideak kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude