Metroaren salneurria igotzeak eztandarazi zuen herritarren pazientzia, baina pentsioen pribatizazioagatik, osasun sistema prekarioagatik, gutxieneko soldata baxuengatik… ere atera dira kalera herritarrak, eta istilu bortitzak izan dituzte.

Herritarren erantzun masiboaren aurrean, atzera egin du Gobernuak eta metroaren salneurria ez igotzeko erabakia hartzeaz gain, bestelako erreformak iragarri ditu presidenteak. Hala nola, Oinarrizko Pentsio Solidarioa %20 igoko dute “berehala”, osasun gastuan tope bat ezartzeko eta medikamentuak diruz laguntzeko legea egingo dute eta 350.000 pesoko gutxieneko diru-sarrera sortuko dute.

Hogei bat mugimenduk greba orokorra deitu dute asteazken honetarako eta mobilizazio eta martxa ugari antolatu dituzte asteazken eta ostegun honetarako. Armadak ere kalean jarraitzen du. Ikusiko da erreformek giroa apaltzea lortuko ote duten.

Istiluak datutan: 15 hildako, 5.400 atxilotu

1990etik Txilek bizi izan dituen protestarik handienak dira egunotakoak. Gutxienez 15 pertsona hil dira jada istiluotan eta 226 zauritu. 5.400 lagun atxilotu dituzte, 10.000 polizia eta militar atera ditu Gobernuak kalera, eta 2.000 ikastetxe baino gehiago itxi dituzte.