Sanferminetako talde bortxaketaren auziko helegiteen gainean ebatziko du Espainiako Auzitegi Gorenak ekainaren 21ean

  • Nafarroako Auzitegi Gorenaren auziak bederatzi urteko espetxe zigorra eskatzen du bost bortxatzaileentzat. Alde guztiek aurkeztu dituzte helegiteak: erasotuak, auzipetuen defentsa abokatuek, Fiskaltzak eta herri akusazioa osatzen duten Nafarroako Gobernuak eta Iruñeko Udalak.  

ARGIA @argia
2019ko maiatzaren 07a
Sanferminetako talde-bortxaketaren epaiaren aurkako manifestazio bat (argazkia: Feministalde).

2016ko Sanferminetan emakume bat taldean bortxatzeagatik bederatzina urteko espetxe zigorra ezarri zien bost akusatuei Nafarroako Lurralde Auzitegiak, eta Nafarroako Auzitegi Gorenak berretsi egin zuen zigorra. Epaiaren aurrean helegiteak jarri zituzten alde guztiek, eta helegiteok ebazteko data jarri du Espainiako Auzitegi Goreneko Bigarren salak: ekainaren 21a.

Auziak sexu erasoengatik zigortzen ditu bortxatzaileak, eta fiskaltzak sexu erasoengatik ordez sexu delituengatik zigortu ditzaten eskatu du.

Auzia aztertuko duen aretoko presidentea Andres Martinez Arrieta izango da. Martinezekin batera, ebazpenean parte hartuko dute Ana Ferrer, Vicente Magro, Francisco Monterde eta Susana Polo magistratuek.

Auzipetutako bost gizonezkoak behin behinean aske daude, epaia irmoa izan artean hala izatea erabaki baitzuen Nafarroako Lurralde Auzitegiak.

Antzerako kasu bat epaiketara, Bilbon

Asteartean ekin diote antzerako kasu baten gaineko epaiketari Bizkaiko Lurralde Auzitegian. 2017ko urtarrilaren 14an 18 urteko emakume bat taldean bortxatzeagatik, hiru gizon daude auzipetuta. Emakumea erasotzeaz gain, erasoa mugikorrarekin grabatzea eta sare sozialetan zabaltzea leporatzen zaie.

Erasoa Bilboko Santutxu auzoan gertatu zen. Erasoa jasan zuen emakumeak salatu zuenez, diskoteka batetik ateratzean ondoezik sentitu eta konortea galdu zuen, eta esnatu zenean biluzik zegoen eta alua minduta zeukan. Ospitalean bortxatua izan zela baieztatu zioten.

Erasotzaileetako bik 20 urte dituzte, eta 28 hirugarrenak. Hiruen zigorrak batuta, 80 eta 100 urte arteko espetxe zigorra eskatzen zaie.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Indarkeria matxista

Indarkeria matxista kanaletik interesatuko zaizu...
Azkenak
EGILEA
Eguneraketa berriak daude