Rosi Zarra. Zaharrak berri?


2024ko ekainaren 22an - 08:48
Azken eguneraketa: 2024-06-24 11:18:45
Zarata mediatikoz beteriko garai nahasiotan, merkatu logiketatik urrun eta irakurleengandik gertu dagoen kazetaritza beharrezkoa dela uste baduzu, ARGIA bultzatzera animatu nahi zaitugu. Geroz eta gehiago gara, jarrai dezagun txikitik eragiten.

Rosi, bai, hala esaten baikenion etxekook eta lagunek. Ekainaren 30ean 29 urte egingo ditu hil zela, ertzainek 7-8 metrora jaurtikitako pilotakada batek eragindako infekzioaren ondorioz. Garbi geratu zen hori, 2023ko urtarrilaren 26an, Poliziaren Biktimen Balorazio Batzordearen aurrean egindako agerraldian edo lan-saioan. Geroztik, urte eta sei hilabete joan dira, eta berririk ez “Giza eskubide, biktima eta aniztasun zuzendaritza” organo kudeatzailearen aldetik. Halako organo baten aldetik biktimenganako beste enpatia eta hurbiltasun jarrera bat espero zitekeen.

29 urte hauetan aurre egin diogu Rosiren heriotzari, bizitzak aurrera egiten baitu, baina, nola egin aurre une hartan eraiki zen gezurrari, gure emazte, ama, senide, laguna, Rosiren heriotza, heriotza naturala izan zela zioen gezurrari? Eta geroztik hori da egia ofiziala. Horrek, etsipena, injustizia sentsazioa eta gaindi ezina den mina eragiten dizkigu. Noiz arte? Horretara kondenatuta gaude betirako? Ez dugu erantzunik merezi Justizia(?) Sailetik? Ez al dago justiziarik biktima mota batzuentzat?

Azal ditzagun azken urte eta erdiko gertakariak kasuaren inguruan:

- 2022ko udan Giza Eskubideen Sailera deitu genuen eta e-maila idatzi, adierazita Xabier (Rosiren alarguna) urteetan gora zihoala eta osasunez ez zegoela ondo, eta kezkatu eta sufriarazten ziola izugarri emaztearen heriotza argitu gabe egoteak oraindik. Udazkenean izandako harremanen ondorioz, 2023ko urtarrilerako lotu genuen Balorazio Batzordearekin hitzordua.

- 2023ko urtarrilaren 26a. Poliziaren Biktimen Balorazio Batzordearekin bilera Arantzazu hotelean.

Urte eta sei hilabete joan dira, eta berririk ez “Giza eskubide, biktima eta aniztasun zuzendaritza” organo kudeatzailearen aldetik. Halako organo baten aldetik biktimenganako beste enpatia eta hurbiltasun jarrera bat espero zitekeen

Lehenik, senarrak eta alabek luze, zehaztasunez eta datuak erabiliz azaldu zituzten zoritxarreko egun hartako gertakariak. Uneko egoera, ertzainek jaurtikitako pilotakada, haien jarrera Rosi lurrean zela… Baita hurrengo egunetako bilakaera ere, infekzioak heriotza eragin zion arte. Hori guztia errespetu osoz eta haienganako enpatia eta gertutasuna azaldu zuten batzordekideen aurrean.

Ondoren, Paco Etxeberria forentsearen galderei erantzunez, Rosiren jarraipena egiten zuen mediku nefrologoak heriotzaren arrazoiak zeintzuk izan ziren azaldu zituen hizkera espezializatuan, maiz, argibide arruntagoak erabilita, guztiok ondo ulertzeko moduan. Ez zuten zalantzarako zirrikiturik utzi. Heriotza pilotakadak eragindako infekzioaren ondorioa izan zen. Batzordeko parte diren forentseek ere ez zuten zalantza agertzeko moduko galderarik egin.

Oso gustura atera ginen saiotik. Gogorra izan zen, barnea astindu zigun, sendatu gabeko zauriak berriz zabaldu ziren, baina, aldi berean, ukendu modukoa eta sendagarria izan zen saioa. Behingoagatik, errespetuz, arretaz eta enpatiaz entzunak izan ginen. Gaia ondo bideratuta zegoen sentipena genuen guztiok.

- Bizpahiru hilabeteren buruan, batzordekideek esan zuten euren erabakia hartu eta Justizia Sailera helaraziko zutela, eta handik jakinaraziko zigutela zerbait. Lasai hartzeko, baliabideak ez zirela ugariak eta denbora behar izaten zela.

Martxoaren 29an, e-mail bat jaso zuen Xabierrek adierazten zuena egun batzuen buruan etxeko posta helbidean espedientearen ebazpena jasoko zuela. Espedientearen izena: Víctima: Rosa Zarra Marin. Zenbakia: xxxxx.

Gaur arte. Urte oso bat ondo pasata, eta berririk ez.

- 2023ko uztailean, Gasteizera deitu genuen ea zer gertatzen zen jakiteko. Gaia zaila zela eta luzatzen ari zela, baina udazkenean zerbait esango zigutela. Ezer ez. Udazkenean, onartutako lehen 66 biktimak aurkeztu ziren Kursaalen egindako ekitaldian. Bertan ez zegoen Rosi.

- Giza-eskubideen zinemaldian, 2024ko apirilaren 13an, Indarkeriaren oi(h)artzunak filma eskaini zuten (Ikuslearen sariaren irabazlea). Filmaren amaieran elkarrizketa izan zen: bertan ziren filmaren zuzendariak, Tamara Muruetagoiena (torturen ondorioz hildako Esteban Muruetagoienaren alaba) eta baita Balorazio Batzordeko burua ere. Amaieran ikusleoi parte hartzeko tartea zabaldu zitzaienean, gure egoera azaldu genuen, urtea pasata zela batzordearekin bildu ginenetik eta inongo berririk ez genuela geroztik. Batzordeko buruak esan zuen bertan ezin zuela azalpenik eman, oso logikoa, eta jarriko zirela harremanetan gurekin. Giza Eskubide Sailean lan egiten duen langile publiko bat gerturatu zitzaigun irteeran eta gauza bera agindu zigun, jarriko zirela harremanetan berehalakoan. Gaur arte. Isiltasuna, jaso dugun erantzuna.

Horren aurrean, guk Rosi maitasunez, goxotasunez eta samurtasunez gogoratzen jarraituko dugu. Eta zauriak sendatzen uzten ez diguten gertakarien eta gezurraren (egia ofizialaren) aurrean, aitortza, justizia eta erreparazioa eskatzen jarraituko dugu. Ekainaren 30ean, 12:30ean, omenaldi xumea egingo diogu Donostian, Amaran.

Tamarak erakutsi digu ez dela etsi behar, eta egiaren eta justiziaren bilaketa bera sendagarria gertatzen dela. Urtero-urtero irekitzen baitzaizkigu zauriak eta berritzen mina, Rosiren urtebetetze egunean, edo heriotzaren urteurrenean, edo, edonor dela ere, pilotakada batez begia galtzeko arriskua duenean, edo, orain dela gutxi futbola ikustera Anoetara zihoan emakume bat hil zorian egon denean…

Jasoko al dugu berri onik ekainaren 30a baino lehen? Berriren bat, behintzat. Hurrengo urtean, 2025ean, 30. urteurrena izango da. Ordurako bai berri onik? Edo berdin jarraituko dugu, zaharrak berri?

Xabier Irazusta, alarguna

Idoia, Amaia, Xabier, Gorka, Asier eta Maider, seme-alabak

Dani Goñi, gainontzeko senideen izenean

Bidali zure iritzi artikuluak iritzia@argia.eus helbide elektronikora

ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.


Kanal honetatik interesatuko zaizu: Irakurleen gutunak
Meaka-Irimo bizirik!

Enpresa batek Irimo mendian zentral eolikoa eraikitzeko asmoa zuela iragarri zigun aspaldi batean haize kolpe batek. Gehienek ezin zuten sinistu, inondik ere. Are gutxiago Irimo mendiaren orografia eta izaera harritsua ezagutzen dituztenek. "Baina ba al dakizu ze nolako... [+]


Bilbao BBK Live-k ‘life’-a xurgatzen dit!

Badator uda, eta horrekin batera, herri, auzo eta hirietako jai herrikoiak. Jaiak beti izan dira aldarrikapen sozial eta politikoen, auzokideen arteko harremanen eta euforia herrikoiaren aterpe. Gure kaleak hartzen dituzte, eta egun batzuez autogestioaren, desberdinen arteko... [+]


Eguzkiak etxebizitza erre du

Turistek neurrigabeko prezioak dituzten apartamentu eta hotelak bete dituzte. Eta zu gurasoen etxean, etsita, konpainia handiek eta espekulatzaileek alokairua puzten duten bitartean.


Eguneraketa berriak daude