PSNren udal hautetsi gero eta gehiago azaltzen ari dira euskara sustatzearen aurka
Orkoiengo alkate sozialista Alejandro Lopezek euskalduna izatea pribilegio bat dela esan eta gero, PSNko hautetsiak euskara sustatzearen aurkako gero eta adierazpen gehiago egiten ari dira, hala Eguesibarren nola Tafallan. Ingurumari horretan, PSNren zuzendaritzak Orkoiengo alkatea babestu egin du.
Eguesibarren, gaztelaniazko jarduera gehiagoren eskean
PSNren Eguesibarko udal taldeko eledun Mikel Bezunarteak gazteentzat gaztelaniazko jarduera gehiago antola ditzan eskatu dio UPNren udal aginte taldeari.
Bezunartearen arabera, otsailetik apirilera euskarazko bederatzi jarduera programatu dituzte eta gaztelaniazko bakarra. “Euskarazko eskaintza ez zaigu handiegia iruditzen, baina gaztelaniazkoa murritzegia da”, azaldu du.
Tafallan, administrari laguntzaile bati C1a eskatzearen aurka
Tafallako Udaleko osteguneko osoko bilkuran plantilla organikoa bozkatuko dute, eta PSNk horren aurka eginen du, EH Bilduren udal aginte taldeak administrari laguntzaile plaza batean euskarazko C1 maila eskatuko duela eta.
PSNren eledun Esther Isoren arabera, Tafallan herritarren %8 soilik mintzatzen da euskaraz. “Euskara meritu moduan aintzat hartzearen alde gaude, baina baldintza moduan ezartzearen aurka”.
Zuzendaritza, Orkoiengo alkatearen alde
Ingurumari honetan, PSNk ohar bat plazaratu du eta udal hautetsion jarrerak norbanakoenak diren edo alderdiaren estrategia baten aitzinean gauden argitzeko tenorean lagungarria suerta daiteke.
Izan ere, ohar horretan, PSNk Orkoiengo alkate Alejandro Lopez babestu egiten du. Gogoratuko denez, Lopezek, herriko ludotekaren kontura, esan zuen haur euskaldunak euskarazko zein gaztelaniazko jardueretara joan daitekeenez, ez garela eskubidez ari baizik eta pribilegioz.
PSNren arabera, “haren adierazpenak testuingurutik kanpo atera dituzte haren aurkako eraso pertsonal interesatua gauzatzeko” eta “horrek ez du bizikidetza sustatzen”.
Alderdi sozialistak halaber nabarmendu duenez, “Orkoiengo errealitate soziolinguistikoan euskarazko zerbitzuen eskaera gaztelaniazkoena baino askoz txikiagoa da”.
Iruñean UPNren aurkako eta EH Bilduren aldeko zentsura mozioaren alde egin eta gero, PSN ez ote den ari bere zenbait boto emaileren aitzinean bere burua zentratu nahian.
LABek ohartarazi du Gipuzkoako Foru Aldundiko behin-behineko 119 langileak egonkortzeko egin den bidea bertan behera gelditu daitekeela, hizkuntza eskakizuna ezarri izanagatik helegitea aurkeztu dutelako. LABek eta ELAk elkarretaratzea deitu dute otsailaren 16rako, Donostian.
Errenteria-Oreretako Aurrera tabernako zerbitzariak euskararekiko "mespretxuz" eta oldarkor erantzun zion euskaraz eskatu zuen bezero bati euskalgintzako hainbat kidek salatu dutenez.
Zizurko Udalaren obretako langile lanpostu baten euskarazko profila atzera bota du Iruñeko Administrazioarekiko Auzien 3. Epaitegiak. Erabaki horren aurka elkarretaratzera deitu dute hainbat eragilek. Hizkuntza Eskubideen Behatokiko zuzendari Agurne Gaubekaren aburuz,... [+]
Nafarroako Justizia Auzitegi Nagusiaren aurrean elkarretaratzea egin dute Zizur Nagusiko Udalaren aurka eman den azken epaia salatzeko. Udalak langile lanpostu batean ezarritako hizkuntza eskakizuna atzera bota du epaitegiak.