Aste guztian hainbat ekimen izango dira: mahai inguruak, hitzaldiak, afariak, jaialdiak... Euskal Herriko gatazka konpontzeko bidean azken urteotan egindako urratsak azalduko dituzte ezker abertzaleko hainbat eragilek eta pertsonak: Amaiurrek, Sortuk, Ernaik, Eleak mugimenduak, herri harresiko kideek, preso ohiek eta gazte auziperatuek.   

Apirilaren 4an Madrilen egingo duten errepresioaren inguruko hitzaldiak zabalduko du egitaraua. Bertan parte hartuko dute Amaiurreko diputatu batek, ALAk (Madrilgo Abokatu Libreen Elkartea) eta torturaren aurkako koordinadorako kide eta abokatu batek.

Italiako hainbat herritan ere ekimen ugari antolatu dituzte, besteak beste Bergamon, Milanen eta Brescian. AFU taldearen kontzertuak, preso ohien eta Ondarroako herri harresiko kideekin hitzaldiek, afariek eta liburuen aurkezpenek osatzen dute egitaraua.

Txile, Bolivia, Kolonbian eta Argentinan ere ekimenak izango dira Elkartasun Astearen barruan. Egitarauari amaiera emateko, Frantziako eta Espainiako Estatuen “errepresio estrategia salatzeko” elkarretaratzeak egingo dituzte kontsulatuen aurrean.