Argentina, Brasil, Paraguai, Uruguai, Venezuela, Bolivia, Txile, Kolonbia, Ekuador, Peru eta Mexiko bere gain hartzen dituen Mercosur merkataritza arloko erakundearen eraginpean Europatik inportatzen diren produktuen %91 liberalizatuko dira. Europar Batasunak (EBk) datu honi aurre hartuko dio berriki onetsitako akordioan: %92 izango dira muga-zergarik ordainduko ez duten jatorri amerikarreko produktuak.

Erabakiak arlo ekonomiko anitzei eragingo die: nekazaritzari batez ere, baina baita industria-sektoreari (ibilgailuak, ekipamendu-ondasunak, produktu kimikoak, farmazia, ehungintza edo zapatagintza) nahiz zerbitzuen sektoreari (finantzarioak, telekomunikazioak eta itsas garraioa) ere. Ondorioa? Merkatu globalari eta Europako zein Hego Amerikako multinazionalei bultzada, baina bertako ekoizle txikien kalterako.

Arazo honi erreparatuta, Contigo-Zurekinek mozio bat aurkeztu du Nafarroako Legebiltzarrean, zeinaren bidez Pedro Sánchezen Gobernuari eskatzen dio akordioa Espainiar Estatuan ezarri ez dezan. UPN, EH Bildu, PP eta Vox proposamenaren alde agertu dira eta idatzia babestu dute, PSNk eta Geroa Baik, ordea, kontra bozkatu dute. Mozioan hasiera batean jasotako puntuei UPNk, zuzenketa baten bidez, Espainiako Gobernuari eskakizun bat gehitu dio: ez dezan ez sinatu ez berretsi merkataritza askeko tratatu hori.

Halaber, talde parlamentari guztiek aho batez onartu dituzte UPNren ekarpenean jasotako beste hiru puntu, Nafarroako Gobernuari zuzenduta: lehenik eta behin, eskatu diote berehala has dadin Espainiako Gobernua presionatzen “ispilu klausulak” ezartzeko, hots, Europar Batasunak haren mugen barruan exijitzen dituen produkzio eta osasun baldintza berberak izatera derrigortu ditzan enpresa hegoamerikarrak. Bigarrenik, Espainiako Gobernuari eska diezaion Nafarroako lehen sektorearen interesak defendatzea. Eta azkenik, akordioa konfirmatuz gero, ekoizle nafarrak babesteko neurriak zehaztea.

Era berean, alderdi guztiek adostu dute Foru Gobernuari eskatzea EBren eta Mercosurren arteko akordioak ekar ditzakeen ondorioen inguruko txosten bat egitea. Honekin batera, Europako Batzordeari dei egingo diote lehenengo sektoreko politika erkide bat abian jar dezan gertuko nekazaritza eta abeltzaintza babesteko eta ekonomia jasangarria bermatzeko.