Hezkuntza Hitzarmena garatzeko gauzatzen ari den prozesuarekin eta hitzarmenean jasotako edukiekin “desadostasuna” agertu du lehenago ere STEILAS sindikatuak, eta desadostasun hori kaleetara aterako dute apirilaren 7an, hitzarmenaren bozketa egunean.

Prentsaurrekoan azaldu dutenez, hitzarmenaz hainbat sindikatuk eta eragilek egindako irakurketa kritikoak plazaratu ostean gehiengo sindikalak deitutako greba eguna sustatu zuen sindikatuak, “adostasunetara iristeko ahalegin asko egin ondoren”. Martxoaren 25ean ziren hezkuntzako sindikatuak greba egitekoak, baina bertan behera utzi behar izan zuten, STEILASek adierazi duenez, haien nahiaren kontra.

Greba aurrera atera ez bazen ere greba deitzeko arrazoiek beren horretan jarraitzen dute sindikatuaren aburuz, eta “ ez da borroka eteteko momentua”. Apirilaren 7an bozkatuko dute Eusko Legebiltzarrean Hezkuntza Hitzarmena, eta egun horretan lanuzteak eta mobilizazioak egingo ditu STEILASek. 7:30etatik 11:00ak arteko lanuztea egingo dute EAEko ikastetxe publikoetan eta 9:30etan Eusko Legebiltzarraren aurrean elkartuko dira, eta EAEko hiri, herri eta auzoetako ikastetxeetan 10:30etan.

“Ez saldu Euskal Eskola Publikoa” lelopean egingo dituzte elkarretaratzeak. STEILASen ustez ez da egun indarrean dagoen “sistema segregatzaileak” sortzen dituen arazoak “ustez konpontzera bideratutako” legerik, baizik eta arazo horiek “sortzen ez dituen egitura irmo bat”. Egitura hori, sindikatuaren hitzetan, Euskal Eskola Publikoa litzateke.

Hona hemen STEILASek Hezkuntza Hitzarmenetik azpimarratzen dituen ideiak:

1. Euskal Eskola Publikoaren Legetik, Euskal Hezkuntza Zerbitzuaren legera pasatuko gara.

2. “Euskal Hezkuntza Zerbitzua” deiturikoa izango dugu hemendik aurrera, sistema publikoa eta pribatua parekatuko dira ikastetxe pribatuetako finantziazioa blindatu ahal izateko. Beraz, Hezkuntza publikoa ez da sistemaren ardatza izango.

3. Ez du publifikazio marko sendo baten alde egiten. Ezta ikastetxe publikoetako matrikulazioa bermatzeko neurririk jasotzen ere.

4. Segregatzailea den sistema duala normalizatu eta betikotzen du.

5. Ikasle askok bere sinesmen, jatorri edo egoera sozioekonomikoagatik jasaten duten bazterkeria gainditzeko neurri eraginkor berririk ez dute jaso.

6. Onarpen prozesu gardenak izateko eta doakotasuna eta laikotasuna bermatzeko neurri zuzentzaile guztiak gaurko legedian jasota daude, eta ez dira betearazten.

7. Ez dute Euskararen aldeko apustu irmorik egiten. Esleituko diren baliabideak aipatu ez eta ikastetxearen esku uzten da ardura. Ez da murgiltze eredurik aipatzen, ez dira ereduak gainditzen eta atzerriko hizkuntzei irekitzen die atea, euskararen kalterako.

8. Hezkuntza sistema propioan atzerapausoa da. Indarrean dagoen araudi estatala berresten baita.

9. Langileen lan-baldintzen aipamenik ez du egiten, nahiz eta dokumentuak eragin zuzena izango duen hauen gain, (kontratu programak, zuzendarien lidergoa, hezkuntza publikoaren aldeko apustu ezak suposatuko duen lanpostu galera…)

10. Haurreskolak Partzuergoa hezkuntza-sisteman txertatu eta hauek eskola mapan sartzeaz ez du hitz egiten.

11. Ez da jasotzen haur eskola pribatuen diru-laguntzak desagertuko diren ala ez.