Manu Ayerdi kontseilari nafarrak dimisioa aurkeztu du, Davalor auziak behartuta

  • Garapen Ekonomikorako Kontseilaria izan da Nafarroako Gobernuan eta UPNk Davalor auzia dela eta bere aurka jarritako keraila baten harira eman behar izan du dimisioa.


2021eko urtarrilaren 29an - 15:22
Ayerdi dimisioa iragartzen. (Argazkia: Nafarroako Gobernua)

Iragan ekainean UPNk salatu zuen Davalor enpresaren auzian Manu Ayerdik prebarikazioa egin zuela eta dirua bide gabe erabili zuela, Sodena Nafarroako garapenerako elkarte publikoak enpresa hari 2,6 milioi euroko diru kopurua eman ziolako hainbat mailegutan. Davalorrek porrot egin zuen ondoren, eta UPNk salatzen du maileguak eman zirela porro egingo zuela jakinda, enpresaren egoera txarra zelako. Maileguok 2015-2017 artean eman ziren Uxue Barkosen gobernuaren garaian, eta hainbat prozeduraren gainetik jauzi egin izana leporatzen diote Ayerdiri.

Orduan, Ayerdik jakinarazi zuen UPNk bere erasoen jomugan jarri zuela, baina guztiz lasai zegoela salaketaren aurrean eta auzitegiek keraila onartzen bazuten dimisioa emango zuela. Abenduaren erdialdera Espainiako Auzitegi Gorenak auzi penala ireki zuen UPNren salaketa aintzat hartuz. Alabaina, ez dago argi horrek esan nahi duen Ayerdi inputatua dagoen eta Nafarroako Gobernuak hori argitu dezala eskatu dio Gorenari.

Edozein kasutan, auzia indarra hartzen ari zen eta Gorenak ezer esan aurretik Ayerdik dimisioa ematea erabaki du, berak esandakoaren arabera, “egoera hau ez delako ona Nafarroak halako une korapilatsu batean behar duen egonkortasunerako”. Nafarroako foru legediaren arabera, edozein kargu publikok postua utzi beharko du auzitegi batek bere aurkako ikerketa irekitzen badu. Uxue Barkosen legealdian egin zen aldaketa hori. Bideo honetan ikus daiteke dimisioa iragartzeko eman duen prentsaurrekoa. Mikel Irujo orain arte Kanpo Ekintzarako zuzendari nagusia izandakoak ordezkatuko du Ayerdi.

Ayerdi, EAJko buruzagi ere bai

Geroa Baik Foru Gobernuan dituen lau kontseilarietatik EAJko bakarra da Ayerdi, eta itzal handia du Nafarroako jeltzaleen artean. Kontseilari izan aurretik EAJko Napar Buru Batzarreko lehendakaria izan zen. Enpresa gizona da eta Uxue Barkosen gobernuan ere ekonomia eta enpresa munduari lotutako ardurak izan zituen. UPNren kritika politikoaz gain, Nafarroako enpresarien artean konfiantza izan duen pertsona da.


Kanal honetatik interesatuko zaizu: Nafarroako politika
Haur eskolak euskaraz eskatu ditu berriz ere Iruñeko Euskalgintzak

Ehunka lagun atera ziren ostegun honetako arratsaldean Sarasate Pasealekutik eta manifestazioa egin zuten Iruñeko Udal Plazaraino, eskatzeko udalari hiriko haur eskoletan euskaraz ikasteko eskubidea izatea lehentasunen artean jar dezala. "Haur eskolak euskaraz: eman... [+]


Estatuaren indarkeriaren biktimei aitortza ekitaldia eginen die Nafarroako foru gobernuak

Maiatzaren 30ean eginen dute Estatuaren eta eskuin muturraren indarkeriaren biktimen aitortza ekitaldia, Baluarten. Biktima zehatzei egiten zaien molde honetako lehen ekitaldi publikoa izanen da, eta 2019ko legearen babespean gauzatuko da.


Itxialdiak egin dituzte Iruñerriko institutuetan Gazaren alde, nahiz eta Nafarroako Gobernuak espresuki eskatu ez baimentzeko

Astearte gauean Israelen genozidioaren aurkako itxialdia "normaltasunez" egin dute DBH eta Batxilergoko ikasleek Iruñerriko hainbat institututan, ARGIAri kontatu diotenez. Itxialdi horiek egin ez zitezen saiatu da Nafarroako Gobernua, astearte eguerdian... [+]


Israel Olinpiar Jokoetatik baztertzeko eskatu du Nafarroako Parlamentuak

Contigo-Zurekin taldeak proposatutako ebazpena onartu du Nafarroako Parlamentuak, EH Bildu eta Geroa Bairen aldeko bozkekin. Israelek Gazan duen jarrera genozida salatu eta neurriak hartzeko eskatu dio Parlamentuak Nazioarteko Olinpiar Batzordeari.


Trafiko eskuduntza bermatzeko Foru Hobekuntzaren erreforma adostu dute Nafarroako eta Espainiako gobernuek

Foru Hobekuntzaren erreforma adostu dute Nafarroako eta Espainiako gobernuek, Trafikoa foru exekutiboaren eskuduntza historiko eta esklusiboa dela blindatzeko.


Eguneraketa berriak daude